TIENWOGIKAL 37 - BUKUIT NE TILIIL Sireet ne Dutero Kanon

Riibei Kamuktaindet ne Toroor chooto che po iman

Tyendap Kalasunet ne po Daudi

¹ Ameng' konyitin che yaei yaityo, amat koamin ng'etkong' agobo che yaei tengekto.

² Amu ma tenitu ketil ko uu susweek, ak koresyo ko uu susweek che ng'orng'or.

³ Imang'u Kamuktaindet ne Toroor ak iyai ne myee; meng'iisye eng' emet, ak isup imanda.

⁴ Paibaitune Kamuktaindet ne Toroor, si kogoonin soomutigap muguleldang'ung'.

⁵ Igoochi Kamuktaindet ne Toroor kondochi pandang'ung'; imang'u ineendet si kosuldaun ne imache.

⁶ Yaei imandang'ung' kotook ko uu lapkeiyet, ak yaei kirwoogutiguk kooluu ko uu peet kween.

⁷ Imuuny eng' Kamuktaindet ne Toroor, ak igen ineendet eng' muitaet; ameng' konyitin chii ne peruri eng' ooreennyi, chiito ne isuldoe ng'aalseet.

⁸ Mete nereeknateet, ak iistoegei nereegek che ng'woneen. Ameiimegei, amu ibu nooto yaityet.

⁹ Amu kiwong'u che yaei yaityo, ago namei emet che igeni Kamuktaindet ne Toroor.

¹⁰ Amu tomo kitigin, si ma komi kiptengekyot; tuun icheeng'e ole komi, ago ma komi.

¹¹ Ago namei emet che talaen; ak kogaaskei eng' kaalyeet ne oo.

¹² Chobei `kiptengekyot yaityet agobo ne po imanda, ak susei kelek agobo ineendet.

¹³ Rorechin `Kiptaiyat ineendet, amu keerei kole nyoonei peetuunnyi.

¹⁴ Kang'us kiptengeginik rotonikwak po chok, ak kariich kwangokwak; si kowiirchi ng'wony ne nyalili ak ne ma tinyei kiy, ak kobar icheek che tebyei eng' iman.

¹⁵ Toorei rotonikwak po chok mugulelwekwak, ak koilyo kwangokwak.

¹⁶ Kaigai che ng'ering' che tinyei ne po imanda kosiir chaang'indap che po kiptengeginik.

¹⁷ Amu ildos eunegap kiptengeginik: ago tiyei Kamuktaindet ne Toroor che po imanda.

¹⁸ Ingen Kamuktaindet ne Toroor peetuusyegap che ititaatiin, ak po koigeny porotennywa.

¹⁹ Ma nyooru kalilanet eng' peetuusyek che yaacheen, ak kobiyong'so eng' peetuusyegap rubeet.

²⁰ Ago lustos che ma po iman, ak kogergeit puunigap Kamuktaindet ne Toroor ak susweek che korooron che po keeweet; iwong'ugei; ee iwong'ugei ko uu iyeto.

²¹ Chiito ne ma po iman kobesenisyei, ama yaagu: ago poisyee ne po imanda aiyebindo, ak kogoitoi kotugul.

²² Amu che ki koberuur Kamuktaindet ne Toroor, kobunjin emet; ago che ki kochup kiwong'u.

²³ Chobei Kamuktaindet ne Toroor ole punooti chii, ak paibaitu eng' atebeennyi.

²⁴ Agot ngo terteryot, koma itei ng'wony, amu namoti Kamuktaindet ne Toroor eunnyi.

²⁵ Ki aa ming'in ak ka aoositu nguno, ago tomo ageer kemeto ne po imanda, ak ma keer kosoomoti `lagokyik amitwogik.

²⁶ Igoitoi kotugul eng' aiyebindo, ak kobesendoi, ak egu lagokyik kaberuret.

²⁷ Itabaanegei yaityo, ak iyai ne myee; ak imeng'iisye koigeny.

²⁸ Amu chamei Kamuktaindet ne Toroor imanda, ama pagaktoi chechiget che iyanotin. Riibootin che po imanda koigeny, ago kiwong'u kesweegap kiptengeginik.

²⁹ Namei emet che po imanda, ak komeny olooto koigeny.

³⁰ Ng'alaali eng' utaatyet ne po iman ak mwaei ng'elyeptanyi imanda.

³¹ Miitei muguleldanyi ng'atuutyetap Kamuktaindennyi; ma ichabaitoi eng' kakwautikyik.

³² Sapchin kiptengekyot chii ne po imanda, ak cheeng'ei kobar ineendet.

³³ Ago ma metochin `Kamuktaindet ne Toroor ineendet eutap kiptengekyot, anan ko kiikyi ye irwookyin.

³⁴ Igen Kamuktaindet ne Toroor, ak isup ooreennyi, ak koeetin inam emet; ye kiwong'u kiptengeginik igeere.

³⁵ Ki ageer kiptengekyot ne tinyei pounateet ne oo, ak kotuneni ko uu keetit ne tuon ne piitei eng' emennyi.

³⁶ Ki abun yooto peetuusyek alak, ak keero, ki ma kota komi; ee, ki acheeng', ago ma anyooru.

³⁷ Riip chiito ne ititaat, ak igeer chiito ne po iman; amu kagesunetap chiichooto ko kaalyeet.

³⁸ Ago ki parei pistoik kibagenge; kagesunetap kiptengeginik ko ng'emisyet.

³⁹ Punu Kamuktaindet ne Toroor yetunetap che po imanda; ineendet irimennywa eng' peetuutap nyalilda.

⁴⁰ Toreti `Kamuktaindet ne Toroor icheek ak kosaru; saru icheek eng' kiptengeginik, ak koeetei, amu kimwechi ineendet.