TIENWOGIKAL 35 - BUKUIT NE TILIIL Sireet ne Dutero Kanon

Saaet ne po toreteet

Tyendap Kalasunet ne po Daudi.

¹ Obargei, ee Kamuktaindet ne Toroor, ak icheeget che kibaregei; yai lugeet ak icheeget che yaiywo lugeet.

² Nam long'eet ak torgochet, ak itonon itoreta!

³ Ng'usu ng'otit, ak iger ooreetap icheeget che onwo. Ileenji saboondanyu, “Aa yetuneng'ung'!”

⁴ Ingolilanso ak koteweerogis che cheeng'ei saboondanyu! Ingoweektagei let ak kotoptobenso icheeget che cheeng'ei koyaiywo ne ya.

⁵ Ingogergeit ak meteteek che ibei usoonet, ak koon malaikaiyatap Kamuktaindet ne Toroor.

⁶ Ingoimen ooreenywa ak kochabait, ak koon `malaikaiyatap Kamuktaindet ne Toroor icheek!

⁷ Amu ki uny mestennywa puch agobo anee eng' keriinget, ki palji puch saboondanyu keriinget.

⁸ Ingoche ineendet `ng'emisyet! Ak ingonam ineendet mesteet ne ki unyei; ingororokyi olooto eng' ng'emisyonooto!

⁹ Yeityo kobaibait saboondanyu eng' Kamuktaindet ne Toroor, ak paibaitu eng' yetunennyi.

¹⁰ Leen kawekyuk tugul, “Ee Kamuktaindet ne Toroor, ng'oo ne ogerge, ne saru ne nyalili eng' ineendet ne kiim kosiir, ne saru ne nyalili ak ne ma tinyei kiy eng' ineendet ne rebei tuguukyik?”

¹¹ Ng'eetos paorinigap lembech; ak teebena tuguuk che mangen.

¹² Yaakwo yaityet eng' ne myee, kot kogoochi saboondanyu kobanan.

¹³ Ago ye kingo myandos icheek ko ki alaachi kuniok; ki aming'in saboondanyu eng' karugutet. Ki asaa ang'uruuksei,

¹⁴ ko uu yo ariirchini chorwa anan weeriit ne kitupche. Ki cham awendoti ak ki ang'uruuge ariir, ko uu ne iteei agobo kamet.

¹⁵ Ago ki poiboitu ye ki ang'wali ak ki iyumgei. Ki iyumjagei kipreprebiinik, ak ki ma anai; ki pacha ama siistos.

¹⁶ Ki ichota icheek miising', ki sus kelek agobo anee.

¹⁷ Ee Kamuktaindet ne Toroor, igeere kot kotyanit? Saru saboondanyu eng' ng'emisyennywa, saru saboondanyu eng' ng'etuunyik.

¹⁸ Aweegun kongoi eng' tuiyet ne oo; alasun eng' ole mi piik che chaang'.

¹⁹ Amegoochi koboiboitunena puunikyuk puch, anan komismis koonyek che wecho puch.

²⁰ Amu ma ng'alaali che po kaalyeet, ago cheeng'ei ng'aleegap ng'aalseet agobo icheek che talaen che po emet.

²¹ Ki iseng'eng'ja icheek miising'; ki le, “Haa, haa! Kagegeer!”

²² Kaigeer inyee, ee Kamuktaindet ne Toroor; amesiis! Ee, Kiptaiyat, amelooitena!

²³ Ng'eet, keer si irwooksewa, agobo ng'aleekyuk, inyee Kamuktaindennyu ak ko Kiptaiyandennyu.

²⁴ Irwooksewa, ee Kamuktaindet ne Toroor, Kamuktaindennyu, ko uu imandang'ung'; amegoochi icheek koboiboitunena.

²⁵ Amegoochi komwa eng' mugulelwekwak, kole, “Haa, kogisuldae ne kogimache!” Amechamji kole, “Kagelugui!”

²⁶ Ingolilanso ak kotoptobenso che poiboi ye kanyoorwo kiy ne ya! Ingilaakyi kalilanet ak teweernateet che ilasunenogei.

²⁷ Ingotyen eng' poiboiyet ak kogaskei icheek che machei imandanyu. Ingomwa icheek kotugul kole, “Ingitoroor Kamuktaindet ne Toroor, ne poiboitune kaalyeetap kiboityondennyi!”

²⁸ Yeityo kong'alaale anyun ng'elyeptanyu imandang'ung', ak kalasuneng'ung' peet komugul.