TIENWOGIKAL 34 - BUKUIT NE TILIIL Sireet ne Dutero Kanon

Riibei `Kamuktaindet ne Toroor piikyik

Tyendap kalasunet ne po Daudi; ye kingo igei kibiywet eng' taitap Abimelek, ne ki oon komwei

¹ Alasu Kamuktaindet ne Toroor kotugul; tebee kutinnyu kalasunennyi kotugul.

² Ilasugei saboondanyu eng' Kamuktaindet ne Toroor; kasei nooto che talaen ak kogaskei.

³ Ongilasu Kamuktaindet ne Toroor, okweek ak anee, ongitoroor tugul kainennyi.

⁴ Ki acheeng' Kamuktaindet ne Toroor ak ki wolwo, ak kisarwo eng' kaiyweisyosyekyuk tugul.

⁵ Inyal ineendet si inyooru kakweng'et; si ma nyoor kalilanet togoochikwak agoi.

⁶ Ki riir kimnyalilyandani, ak ki kasyi Kamuktaindet ne Toroor, ak ki sar ineendet eng' nyalilwogikyik tugul.

⁷ Menyei malaikaiyatap Kamuktaindet ne Toroor komoswek tugul che po icheeget che iywei Kamuktaindet ne Toroor, ak kosaru icheek.

⁸ Ochamcham anyun si onai ole myee Kamuktaindet ne Toroor. Paibai miising' chiito ne imang'u ineendet!

⁹ Oiywei Kamuktaindet ne Toroor, okweek piikyik che tiliileen, amu ma rarchin kiy icheek che iywei ineendet.

¹⁰ Rarchin kirugigap ng'etuunyik ak koamei rubeet; ago ma rarchin kiy age tugul ne myee icheeget che cheeng'ei Kamuktaindet ne Toroor.

¹¹ Obwa lagochu, ogasa, si aneetaak kaiyweisyet ne oiywei Kamuktaindet ne Toroor.

¹² Ng'oo chii ne machei kosap keny, ak kochamei peetuusyek che chaang' si kogeer ne myee?

¹³ Riip ng'elyeptang'ung' eng' yaityo, ak kuting'ung' si ma mwa ng'aalseet.

¹⁴ Istoegei yaityo, ak iyai ne myee; cheeng' kaalyeet, ak isup.

¹⁵ Tokyingei konyegap Kamuktaindet ne Toroor che po imanda, ak kasei itiikyik riirekwak.

¹⁶ Ago kirindoi togeetap Kamuktaindet ne Toroor che yaei yaityo, si koisto kabwaatennywa eng' ng'wony.

¹⁷ Ye ki riiryo che po iman, ko ki kas Kamuktaindet ne Toroor, ak ki sar icheek eng' nyalilwogikwak tugul.

¹⁸ Neegitee Kamuktaindet ne Toroor icheeget che ilyotiin mugulelwekwak, ak kosaru icheek che ki konyeratitu mugulelwekwak.

¹⁹ Chaang' nyalilwogigap ne po imanda; ago saru `Kamuktaindet ne Toroor ineendet eng' chooto tugul.

²⁰ Riibei kawekyik tugul, ma ilei agot agenge.

²¹ Parei yaitwogik sogoranik; ak kirwookyin che wechei ne po imanda.

²² Ityachi Kamuktaindet ne Toroor saboonwegap kiboitiinikyik; ak ma kirwookyin agot agenge ne imang'u ineendet.