TIENWOGIKAL 33 - BUKUIT NE TILIIL Sireet ne Dutero Kanon

¹ Oboiboitu eng' Kamuktaindet ne Toroor, okweek che oo po imanda! Nyoljin kalasunet che po iman.

² Oweekyi Kamuktaindet ne Toroor kongoi eng' ketubet; otyenji kalasunoik eng' kibugandet ne tinyei inoik taman.

³ Otyenji tyendo ne leel; obut komyee si kogasak tyendo.

⁴ Amu po iman ng'olyootap Kamuktaindet ne Toroor; ak yaei poisyonikyik tugul eng' imanda.

⁵ Chamei ineendet imanda ak kirwooget, nyiitaat ng'wony chamyet ne tala ne po Kamuktaindet ne Toroor.

⁶ Ki kiyai kipsengwet eng' ng'olyootap Kamuktaindet ne Toroor, ak chaang'indonywa tugul eng' kabuusetap kutinnyi.

⁷ Iyumi peegap nyanjet koigei tulwo; ak konoree rirosyek chogenik.

⁸ Ingoiywei ng'wony tugul Kamuktaindet ne Toroor! Ingobotanso piik tugul che menyei ng'wony, amu ineendet.

⁹ Amu ki mwa, ak ki yaak; ki ng'at, ak ki tonon.

¹⁰ Walei Kamuktaindet ne Toroor ruchinaigap pororyosyek koek puch; yaei kabwaatutigap piik koek che ma tilei kiy.

¹¹ Tonondos ruchinaigap Kamuktaindet ne Toroor koigeny, ak kabwaatutigap muguleldanyi eng' ibinwek tugul.

¹² Iberuurot pororyet ne Kamuktaindennywa Kamuktaindet ne Toroor; piik che ki kolewen koek porotennyi!

¹³ Ing'ururi Kamuktaindet ne Toroor eng' kipsengwet, keerei ineendet weeriik tugul che po piik.

¹⁴ Keeroti eng' ole menyei piik tugul che mi ng'wony.

¹⁵ Ineendet ne yaei mugulelwekwak tugul, ak koruchin poisyonikwak tugul.

¹⁶ Ma mi laitoryat ne saruunegei chaang'indap lugeet; ma kisaru ne nyigan eng' kimnateet ne oo.

¹⁷ Ki it puch paraisiit ne po lugeet eng' katerteeret; ama saru chii eng' kimnateennyi ne oo.

¹⁸ Ogeero, keerei konyegap `Kamuktaindet ne Toroor icheek che iywei ineendet, icheeget che igeni rireenennyi,

¹⁹ si kosar saboonwekwak eng' meet, ak koriip kosapcho eng' rubeet.

²⁰ Igeni saboonwekyok Kamuktaindet ne Toroor, ineendet toretindennyo ak long'ennyo.

²¹ Ee poiboitu mugulelwekyok eng' ineendet, amu ki kimang'u kainennyi ne tiliil.

²² Ingotebenech rireeneng'ung', ee Kamuktaindet ne Toroor, ko uu ye ki kigenin.