TIENWOGIKAL 32 - BUKUIT NE TILIIL Sireet ne Dutero Kanon

Kagasetapkei amu nyoetap kaat agobo tengekto

Tyendap Kalasunet ne po Daudi. Kaneetisyet.

¹ Igasatkei ne kigenyochi kaat pistoennyi, ne kigetuch chalwoktanyi.

² Paibai miising' chii ne ma iityin Kamuktaindet ne Toroor tengekto, ama komi ng'aalseet muguleldanyi.

³ Ye ki asise, koosegitu kawekyuk, amu tigenennyu peetuut komugul.

⁴ Amu kichiila eung'ung' peet ak kemoi. Ki yaam poortanyu ko uu ye kabiit kemeut.

⁵ Ki amwaun chalwoktanyu, ak ma aung'enen tengektonyu; ki ale, “Ang'aang'jini Kamuktaindet ne Toroor pistaosyekyuk;” ak ki inyoiywa kaat chalwoktap tengektonyu.

⁶ Ara anyun, ingosain chii age tugul ne tiliil ye ta komuuchi konyoorun. Iman ye kagong'irtagei peek che po kirwooget, koma itei ole mi ineendet.

⁷ Inyee ko ii oldanyu ole aung'egei; iriibo inyee si ma nyoorwo nyalilda. Iyiemena tyenwogigap yetunet.

⁸ Atigoonin ak aneetiin eng' ooreet ne ibune. Ageerotin ak ang'omitin.

⁹ Amoige paraisiit, anan nyumbut, che ma tinyei kaguiyet, che tinyei kariik eng' kutusweek, ak anook che kirang'e, ngo ma uu nooto koma riikyin.

¹⁰ Nyooru ng'waninwogik che chaang' kiptengekyot, ago kimuute rireenetapkei ne imang'u Kamuktaindet ne Toroor.

¹¹ Ogaaskei ak oboiboitu eng' Kamuktaindet ne Toroor, okweek che oo po imanda! Otyen eng' poiboiyet, okweek tugul che oo po iman eng' mugulelwekwok!