TIENWOGIKAL 31 - BUKUIT NE TILIIL Sireet ne Dutero Kanon

Kimang'u Kamuktaindet ne Toroor eng' saitap pichiindo

Po ne oo eng' putiik. Tyendap Kalasunet ne po Daudi.

¹ Amang'un inyee, ee Kamuktaindet ne Toroor, ameng' alilan agoi; sarwo eng' imandang'ung'.

² Epcha iit, sarwo chokyi! Egu rwandet ne kiim eng' anee, irimet ne kiim ne sarwo.

³ Amu inyee ko ii rwandennyu ak irimennyu; eng' nooto anyun indoiywa ak imutata amu kaineng'ung'.

⁴ Imaanda eng' mesteet ne ki kiriich agobo anee eng' ung'oot; amu inyee ko ii ole amwechini.

⁵ Kande saboondanyu eung'ung'. Ki ityaacha, ee Kamuktaindet ne Toroor, inyee Kamuktaindet ne po imanit.

⁶ Aweche icheek che isubi atebosyek che ma nyolu che po lembech; ago amang'u anee Kamuktaindet ne Toroor.

⁷ Agasigei ak abaibaitu eng' rireeneng'ung', amu ki igeer nyalildanyu; ki inai saboondanyu eng' peetuusyegap nyalilda.

⁸ Ama ichamde konama eutap puunyoot; ki icham kotonone keelyekyuk ole paraa.

⁹ Rireena, ee Kamuktaindet ne Toroor, amu ami nyalilda; machei kobek konyekyuk amu arageneet, kobooto saboondanyu ak poortanyu.

¹⁰ Kagowong'kei peetuusyekyuk amu arageneet, ak kenyiisyekyuk eng' tigenet. Kagorerwo kimnateet amu tengektonyu, ak kagoosegitu kawekyuk.

¹¹ Kaegu ne iteweerat amu puunikyuk tugul, ne siirei ko piigap kokwennyu. Ki aegu kiit ne kiywei agot eng' piik che kogingengei; kimweena che kigeera eng' ooreet.

¹² Kigeutyeno ko uu chii ne ki kome; ki aige tereet ne kigoiye.

¹³ Ki agas kataamsetap che chaang', ki koyiema kamuiset. Ye ki ituiyogei korwooch agobo anee, ye ki cheeng'ei ooreet ne parena.

¹⁴ Ago ki amang'un inyee, ee Kamuktaindet ne Toroor, ki ale, “Inyee ko ii Kamuktaindennyu.”

¹⁵ Miitei peetuusyekyuk eung'ung'; sarwo eng' eunegap puunikyuk, ak eng' icheek che onwo.

¹⁶ Ingokweny togeng'ung' kiboityondeng'ung'. Sarwo eng' chamyeng'ung' ne tala.

¹⁷ Ameng' alilan, ee Kamuktaindet ne Toroor; amu kaaguurin; ingolilanso kiptengeginik, ingosiisyo icheek eng' ye mi meet.

¹⁸ Ingonamak kuut kiplembechonik; che itaami che po imanda eng' menoteet, eng' kachaunetapkei ak sasisyet.

¹⁹ Ee, oo ne tya myeeindong'ung', ne ki igonorchi icheek che iywein! Ne ki iyachi icheek che imang'un eng' taitap weeriigap piik!

²⁰ Iung'e icheek ole imi ole ung'aat si ma ityi chaamsetap piik. Iunye icheek eng' ung'oot eng' emait si ma nyoor polateet ne po ng'aleek.

²¹ Iberuurot Kamuktaindet ne Toroor, amu ki koboorwo chamyennyi ne tala ne kikwong'ee eng' nganaseet ne kiim.

²² Ago ki amwa eng' sartaet ale, “Kigeistaa eng' taing'ung'.” Ago ki igas soomutikyuk, ye ki ariirchin.

²³ Ocham Kamuktaindet ne Toroor, okweek piikyik tugul che tiliileen! Riibei Kamuktaindet ne Toroor che iyani, ago yaakyin eng' chaang'indo ne poisyee menoteet.

²⁴ Ogimegitu, ak ingonyiganitu mugulelwekwok, okweek tugul che ogeni Kamuktaindet ne Toroor!