TIENWOGIKAL 30 - BUKUIT NE TILIIL Sireet ne Dutero Kanon

Saaet ne po mwaetap kongoi

¹ Alasun, ee Kamuktaindet ne Toroor, amu ki ieeta, ama igoochi puunikyuk kogasenagei.

² Ee Kamuktaindet ne Toroor, Kamuktaindennyu, ki ariirchin, ak ki isooba.

³ Ee Kamuktaindet ne Toroor, ki imoong'u saboondanyu eng' ye mi meet; ki igoono asap, si ma we keriinget.

⁴ Otyenji Kamuktaindet ne Toroor kalasunet, okweek che oo chechiik che tiliileen, oweekyi kongoi kainennyi ne tiliil.

⁵ Tebyei nereegekyik ne matya; ichuldos chametap Kamuktaindet ne Toroor eng' sabeetap chii. Mi riirek kemout, ago piitu poiboiyet karon.

⁶ Ak ki ale eng' perurtanyu, “Ma kiistaa.”

⁷ Eng' chameng'ung', ee Kamuktaindet ne Toroor, ko ki igoono atonon ko uu tulweet ne kiim. Ago ye ki iuny togeng'ung'; ko ki aiyweisye.

⁸ Ki ariirchin, inyee, ee Kamuktaindet ne Toroor; ak ki ariirchin ee Kamuktaindet ne Toroor:

⁹ “Itinyei keljino nee ye kaamei, ye kaawe keriinget? Ilasun temburyek? Tos imuuchi kobarta imandang'ung'?

¹⁰ Kas, ee Kamuktaindet ne Toroor, ak rirenagei; egu toretindennyu, ee Kamuktaindet ne Toroor!”

¹¹ Ki iwal kateennyu koek ureryet; ki ireegunena kuniet, ak ilaakwa poiboiyet.

¹² Si kobiit kolasun saboondanyun ama siisei. Ee Kamuktaindet ne Toroor Kamuktaindennyu, aweegun kongoi koigeny.