TIENWOGIKAL 28 - BUKUIT NE TILIIL Sireet ne Dutero Kanon

Saaet agobo toreteet

Tyendap Kalasunet ne po Daudi.

¹ Aguurin, ee Kamuktaindet ne Toroor! Ameger itiiguk, rwandennyu, eng' komostanyu, amu, ngot isiis eng' anee, aige icheek che pendi keriinget.

² Kas soomutikyuk, ye ariirchinin, ye anamjini parak eunekyuk atokyini oldang'ung' ne tiliil.

³ Amewiirta kobooto kiptengeginik, anan kobooto che yaei yaityo; che mwachingei kaalyeet ak piigap kokwet, ago tinyei suryet eng' mugulelwekwak.

⁴ Igoochi ko uu poisyonikwak, ko uu ole tee yaetap yautikwak. Igoochi ko uu poisyetap eunekwak; yookyi che nyoljin.

⁵ Amu ma mage kiy poisyonigap Kamuktaindet ne Toroor, anan poisyetap eunekyik, putei `Kamuktaindet ne Toroor icheek ama koteechei kogeny.

⁶ Iberuurot Kamuktaindet ne Toroor, amu ki kogaswa soomutikyuk.

⁷ Kamuktaindet ne Toroor ko kimnateennyu ak long'ennyu; imang'u muguleldanyu ineendet. Kigetoreta ak igasegei muguleldanyu miising'; alasu ineendet eng' tyendanyu.

⁸ Kamuktaindet ne Toroor ko kimnateetap piikyik; ineendet irimeetap yetunetap nenyinet ne ki kiil.

⁹ Saru piiguk, ak iberuur poroteng'ung'; pai icheek, ak imutate agoi koigeny.