TIENWOGIKAL 27 - BUKUIT NE TILIIL Sireet ne Dutero Kanon

Kamang'unet ne kimang'u Kamuktaindet ne Toroor eng' nyiganateet

Tyendap kalasunet ne po Daudi.

¹ Kamuktaindet ne Toroor ko lapkeiyennyu ak yetunennyu; tos aiywei ng'oo? Kamuktaindet ne Toroor ko kimnateetap saboondanyu; aiywei ng'oo?

² Ye ki chea che yaei yaityo, kole koam poortanyu, puunikyuk ak usiikyuk, ko ki kinach icheek ak ki ibutyo.

³ Agot ngo yiema lugeet, ko manyogoritu muguleldanyu; ngo ng'eetya pooryeet, atese tai kora anyiganitu.

⁴ Ki amage kiit agenge Kamuktaindet ne Toroor, nooto ne acheeng'e: ale atebee kootap Kamuktaindet ne Toroor peetuusyek tugul kotee asabe, si ageer karaaranindap Kamuktaindet ne Toroor, ak abwaati eng' hekalunnyi.

⁵ Amu ung'ena koonnyi eng' peetuutap nyalilda; ee, ung'ena emainnyi eng' ole ung'aat, ak ko kanapchino rwandet parak.

⁶ Ak koeeta nguno agee puunikyuk che yiema. Agoitoi koroseek che po kagasetapkei eng' emainnyi; atyeni ak alasu Kamuktaindet ne Toroor.

⁷ Kasa, ee Kamuktaindet ne Toroor, ye ariire, rireena ak iwolwoo.

⁸ Ye ki le muguleldanyu, “Ocheeng' togeennyu!” Acheeng'e togeng'ung', ee Kamuktaindet ne Toroor.

⁹ Ameung'ena togeng'ung'. Ameiste kiboityondeng'ung' eng' nereegek; inyee ne ki iegu toretindennyu. Ameona, amemeta, ee Kamuktaindetap yetunennyu.

¹⁰ Agot ngo ki kometa abba ak kamennyu, konama Kamuktaindet ne Toroor.

¹¹ Ee Kamuktaindet ne Toroor, ineeta oreng'ung', ak imutena ooreet ne litit, amu puunikyuk.

¹² Amegocha mageetap puunikyuk; amu kong'eetya paorinik che po lembech, che mang'une kutusweekwak kolgolyet ko uu kabuuset.

¹³ Kaayan ale ageere myeeindap Kamuktaindet ne Toroor, eng' emetap piik che saptos.

¹⁴ Igen Kamuktaindet ne Toroor! Kimitu ak ingonyiganit muguleldang'ung'! Ee, igen Kamuktaindet ne Toroor!