TIENWOGIKAL 26 - BUKUIT NE TILIIL Sireet ne Dutero Kanon

Saaet agobo kirwoogetap imanda

Tyendap Kalasunet ne po Daudi.

¹ Ibesyeiwo, ee Kamuktaindet ne Toroor, amu ki awendotee kagesunatennyu pogei, ki amang'u Kamuktaindet ne Toroor amachuchuige.

² Isyacha, ee Kamuktaindet ne Toroor, ak ityema; tyem kabwaatutikyuk ak muguleldanyu.

³ Amu mi tainnyu chamyeng'ung' ne tala, ak ki awendotee imaning'ung'.

⁴ Tomo ketebi ak piik che iberberisyei; ama kinamegei ak ng'aalik.

⁵ Aweche tuiyetap che yaei yaityo, ama kitebye ak kiptengeginik.

⁶ Auni eunekyuk amu ma tiinya lelutyo, si amuut kaptisisyeng'ung', ee Kamuktaindet ne Toroor,

⁷ si atyen tyendap kongoi kogasak, ak ang'alaalee poisyoniguk tugul che kikwong'ee.

⁸ Ee Kamuktaindet ne Toroor, achame meng'ootetap koong'ung', ole menyei teegistang'ung'.

⁹ Ameistaa kobooto kiptengeginik, anan saboondanyu kobooto rumiik,

¹⁰ mi eunekwak kolgolyet, ak nyiitootiin eunekwak che po tai tuguuk che kigoigoisye.

¹¹ Ago anee, awendotee kagesunatennyu pogei; ityaacha, ak irireenage.

¹² Tononee keldanyu ole myee: alasu Kamuktaindet ne Toroor eng' tuiyosyek.