TIENWOGIKAL 25 - BUKUIT NE TILIIL Sireet ne Dutero Kanon

Saaet agobo riipseet ak katyaknateet

Tyendap Kalasunet ne po Daudi.

¹ Atokyinin saboondanyu, ee Kamuktaindet ne Toroor.

² Ee Kamuktaindennyu, ki amang'un; amegoono alilan; amegoochi puunikyuk kogasenagei.

³ Ee, amegoochi kolilaan ne igenin; ililandos icheek che ng'aalsei puch.

⁴ Iboorwo ortinweguk, ee Kamuktaindet ne Toroor; ineeta ole ibune.

⁵ Indoiywa eng' imaning'ung' ak ineeta, amu ii Kamuktaindetap yetunennyu; ageniin peetuut komugul.

⁶ Ee Kamuktaindet ne Toroor, ibwaat rireenosyeguk ak chamyeng'ung' ne tala; amu ki mi kobooch keny.

⁷ Amebwaat tengekwogik anan pistoennyu che po ming'inatennyu; ibwaata ko uu chamyeng'ung' ne tala, amu myeeindong'ung', ee Kamuktaindet ne Toroor.

⁸ Kamuktaindet ne Toroor ko myee ak ko po iman, eng' nooto anyun ineeti ineendet kiptengeginik eng' ooreet.

⁹ Indochin che talaen eng' kirwooget; ak ineeti che talaen ooreennyi.

¹⁰ Chamyet ne tala ortinwek tugul che po Kamuktaindet ne Toroor ak ko po imanit, eng' icheek che riibei kayomisennyi ak paornatosyekyik.

¹¹ Amu kaineng'ung', ee Kamuktaindet ne Toroor, inyoiywa kaat tengektonyu, amu oo.

¹² Ng'oo anyun, chii ne iywei Kamuktaindet ne Toroor? Ineeti `Kamuktaindet ne Toroor ineendet eng' oor ne leweni.

¹³ Tebyei saboondanyi eng' poroteet, ak konyaban iyotennyi emet.

¹⁴ Miitei ung'ootyetap Kamuktaindet ne Toroor kobooto icheek che iywei ineendet; ak koboorchi icheek arorutyennyi.

¹⁵ Tokyingei konyekyuk Kamuktaindet ne Toroor kotugul; amu inemu keelyekyuk eng' mesteet.

¹⁶ Iweekyage ak irireena, amu ami aneege ak anyalili.

¹⁷ Katesak nyalilwogik che po muguleldanyu; imaanda eng' pichiinwekyuk.

¹⁸ Keer nyalildanyu ak aragenennyu; ak nyoiywo kaat tengekwogikyuk tugul.

¹⁹ Keer puunikyuk amu chaang'; ak kowecho eng' wegeet ne koroom.

²⁰ Riip saboondanyu, ak isarwo; ameng' alilan, amu amang'un.

²¹ Ingoriibo kagesunatetapkei ak imanda, amu ageniin.

²² Ee Kamuktaindet, ityaach Israel, eng' nyalilwogikyik tugul.