TIENWOGIKAL 24 - BUKUIT NE TILIIL Sireet ne Dutero Kanon

Kamuktaindet ne Toroor yaindet

Tyendap Kalasunet ne po Daudi.

¹ Po Kamuktaindet ne Toroor ng'wony ak tugul che nyiitaat olooto; ng'wony, ak che menyei olooto;

² amu ineendet ne ki lumdoi ng'wony eng' nyanjosyek, ak kogimit eng' ainoosyek.

³ Ng'oo ne togostoi tulweetap Kamuktaindet ne Toroor? Ak ng'oo ne tononi eng' oldanyi ne tiliil?

⁴ Ineendet ne tiliileen eunek ak ko tiliil muguleldanyi, ne ma lasyingei saboondanyi tuguugap yaityo, ama iyastos eng' ng'aalseet.

⁵ Taachei ineendet kaberuret eng' Kamuktaindet ne Toroor, ak imanda eng' Kamuktaindetap yetunennyi.

⁶ Niito ibinda ne cheeng'ei ineendet, ne cheeng'ei togeng'ung', ee Kamuktaindetap Jakobo.

⁷ Ong'eet met, okweek kurgotik; ong'eet met, okweek kurgotik che po koigeny, si konyo oriit Laitoryatap teegisto.

⁸ Ng'oo Laitoryatap teegisto? Kamuktaindet ne Toroor ne kiim ne po kamuktaet, Kamuktaindet ne Toroor ne po kamuktaet eng' lugeet.

⁹ Ong'eet met, okweek kurgotik; ee, ong'eet met, kurgotik che po koigeny, si konyo ko Laitoryatap teegisto.

¹⁰ Ng'oo Laitoryandani po teegisto? Kamuktaindet ne Toroor ne po lugoosyek, Ineendet Laitoryatap teegisto.