TIENWOGIKAL 22 - BUKUIT NE TILIIL Sireet ne Dutero Kanon

Riirek amu mi nyalilda

Po ne oo eng' putiik. Tyendap Kalasunet ne po Daudi.

¹ Kamuktaindennyu, Kamuktaindennyu, amu nee si ibagaakta? Amu nee si ilooena, ametoreta, amu nee si ilooitune ng'aleegap tigenennyu?

² Ee Kamuktaindennyu, ariire peet ago mewolu; ak eng' kemoi, amasise.

³ Ago ii tiliil, inyee ne imenye kalasunoigap Israel.

⁴ Ki imang'un kwanisyekyok; ki imang'un ak ki isaru.

⁵ Ki riirchin ak kinyoor saruunet; ki imang'un ak ki ma ililanso.

⁶ Ago anee ko aa kutyet, ma aa chii; anee ne kirosyin eng' piik, ak ne sasaat eng' piik.

⁷ Rorechino tugul che keera; ak kochota eng' kutit, kolelechi metowek, koleen,

⁸ tiegei Kamuktaindet ne Toroor; si kosaruun; ingosar ineendet, ko uu ye paibai Kamuktaindet ne Toroor eng' ineendet.

⁹ Ago inyee ne ki imoong'wa eng' moetap kamennyu; inyee ne ki igoono amang'un ye ki achuchuni.

¹⁰ Ki kiwiircha oldang'ung' kobooch ami moo; kobooch ami moetap kamennyu, ko ii Kamuktaindennyu.

¹¹ Amelooitena; amu neegit nyalilda; ak ma mi ne toreton.

¹² Kagoyiema kiruugik che chaang'; kagoyiema kiruugik che koroomen che po Bashan.

¹³ Kagoseng'eng'ja, ko uu ng'etundo ne kombori ak koboriseni.

¹⁴ Kagitumda ko uu peek, ak kagong'ulyelis kawekyuk tugul; uu muguleldanyu masamek; ak kochootyo eng' moennyu.

¹⁵ Kagoyaam kimnateennyu ko uu rokyet; ak kanamgei ng'elyeptanyu ak tagilgilyet; ak kaimutya temburyegap meet.

¹⁶ Amu kagoyiema sesenik; kagogercha ooreet tuiyetap kiptengeginik. Katoor eunekyuk ak keelyekyuk.

¹⁷ Amuuchi aiit kawekyuk tugul; keera ak konjurura.

¹⁸ Pchechingei ngoroikyuk, ak serei parbareek agobo ngoryennyu.

¹⁹ Ago inyee, ee Kamuktaindet ne Toroor, amelooitena! Ee kimnateennyu, chogu toreto!

²⁰ Saru saboondanyu eng' rotwetap chok, saru chamanennyu eng' kimnateetap seset.

²¹ Sarwo eng' kutitap ng'etundo; ee, kaiwolwo eng' kuinoigap soenik.

Tyendo ne po mwaetap kongoi

²² Amwachini kaineng'ung' tupchosyekyuk; alasun eng' kwenutap tuiyet:

²³ Okweek che ogonyiti Kamuktaindet ne Toroor, olasu ineendet! Okweek tugul che oo iyoteetap Jakobo, otoroor ineendet; oiywei ineendet okweek tugul iyoteetap Israel!

²⁴ Amu ki ma sas anan kowech nyalildap ne kinyaliili; ama ung'e togeennyi ineendet; ago ki kas ye kingo riirchi ineendet.

²⁵ Inyee ne alasu eng' kwenutap tuiyet ne oo; agoitoi che ki aaroorte eng' taitap icheek che iywei ineendet.

²⁶ Amisyei che talaen ak kobiyong'so; ilasu Kamuktaindet ne Toroor che cheeng'ei ineendet. Ingosapcho mugulelwekwok koigeny!

²⁷ Tuun ibwaati Kamuktaindet ne Toroor ole poochin ng'wony tugul ak koweekyigei ineendet; tuun kutung'jinin inyee ortinwek tugul che po pororyosyek.

²⁸ Amu po Kamuktaindet ne Toroor laitornatet; ak pou ineendet pororyosyek.

²⁹ Tuun amisyei tugul che neryootiin che po ng'wony, ak kolasu; ak tuun ing'uruukyin ineendet tugul che pendi temburyek, agot ineendet ne ma tuun imuuchi koriip saboondanyi kosap.

³⁰ Tuun poisyechin ineendet iyoteet; ki ityin Kiptaiyat eng' ibinwek,

³¹ pwoonei kobartoi imandanyi eng' piik che tuun kisichei, keele, ineendet ne ki yai.