TIENWOGIKAL 21 - BUKUIT NE TILIIL Sireet ne Dutero Kanon

Kongoi agobo katerteeret

Po ne oo eng' Putiik. Tyendap Kalasunet ne po Daudi

¹ Poiboitu laitoryat eng' kimnateng'ung', ee Kamuktaindet ne Toroor, poiboitu ne tya eng' yetuneng'ung'!

² Ki igoochi kiit ne machei muguleldanyi, ama ietee kiit ne kosoom.

³ Amu isip igoochini kaberuroigap myeeindo; igerchinee metit naaryeetap thahabu ne karaaran.

⁴ Kisoomin saboondo, ak ki igoochi; agot chaang'indap peetuusyek che pendi koigeny ak koigeny.

⁵ Oo telunatennyi eng' yetuneng'ung'; ilaakyini teegisto ak etunateet.

⁶ Amu iyae ineendet koek perurto agoi koigeny; igoochini kogaskei eng' poiboiyetap togeng'ung'.

⁷ Amu imang'u `laitoryat Kamuktaindet ne Toroor, ak amu chamyet ne tala ne po Ineendet Ne Toroor Miising' koma ki istoi ineendet.

⁸ Nyooru eung'ung' puuniguk tugul; nyooru eung'ung' ne po tai icheeget che wechin.

⁹ Iwong'u icheek eng' maat ne ng'eteteni eng' peetuutap nereegeguk. Lugui `Kamuktaindet ne Toroor icheek eng' nyitatennyi, ak kobeel maat icheek kogees.

¹⁰ Tuun ing'eme logoekwak iiste eng' ng'wony, kobooto iyotennywa eng' kwenutap weeriigap piik.

¹¹ Agot ngo chop icheek koyaun yaityo; agot ye ibwaat koyai ne ya, koma koi imuuch icheek koyai.

¹² Amu iweechi icheek kotuktochin patai, igeresach kipchaboniguk si itokyi icheek.

¹³ Tororitu, ee Kamuktaindet ne Toroor, eng' kimnateng'ung'! Tuun ketyen ak kilasu kimnateng'ung'.