TIENWOGIKAL 20 - BUKUIT NE TILIIL Sireet ne Dutero Kanon

Saaet agobo katerteeret

Po ne oo eng' putiik. Tyendap Kalasunet ne po Daudi.

¹ Ingowolun Kamuktaindet ne Toroor eng' peetuutap nyalilda; ingoeetin kainetap Kamuktaindetap Jakobo.

² Ingoyogun toreteet eng' Hekaluut, ak kotiin kobunu Zion.

³ Ingobwaat kagoochinoiguk tugul, ak ingocham tiseiyweguk che kibeelei.

⁴ Ingogoonin ko uu ye machei muguleldang'ung', ak ingosuldaun ruchinaiguk tugul.

⁵ Kigasegei acheek yetuneng'ung', ak kinamjini parak songolikyok eng' kainetap Kamuktaindennyo. Ingosuldaun Kamuktaindet ne Toroor soomutiguk tugul.

⁶ Angen nguno ale saru Kamuktaindet ne Toroor nenyi ne iilaat; woljin ineendet kobun kipsengwet nenyi tiliil eng' eunnyi ne po tai kogoochin katerteerisyosyek che eecheen.

⁷ Imang'u alak kariisyegap lugeet ak alak paraisisyek; ago kibwaati acheek kainetap Kamuktaindet ne Toroor, Kamuktaindennyo.

⁸ Terteryote icheek ak kobutyo, ago acheek ko kageng'eetye, ketononse.

⁹ Ee Kamuktaindet ne Toroor, saru laitoryat; ak iwolwech ye kiguursei.