TIENWOGIKAL 2 - BUKUIT NE TILIIL Sireet ne Dutero Kanon

Kayomisetap Kamuktaindet ne Toroor

¹ Amu nee si koyumgei pororyosyek ak koboldos? Amu nee si kobwaatoti piik tuguuk che ma namegei ak kiy?

² Tetegei laitorinigap ng'wony, ak irwoochi pounik che kagotuiyo, agobo Kamuktaindet ne Toroor ak nenyi ne iilaat.

³ Mwaei icheek kole, “Ongeng'eti tuguukwak che ratiisye, ak kewiirte poroonikwak eng' oldanyo.”

⁴ Roryei ineendet ne tebyei eng' kipsengwet; ak kochot `Kiptaiyat icheek.

⁵ Ak kong'alaalji anyun eng' nereegekyik, ak konyaliil icheek eng' nereegekyik che ng'woneen, kole,

⁶ “Kande laitoryandennyu `Zion tulweennyu ne tiliil.”

⁷ Abartoi ng'atuutyetap Kamuktaindet. Ki leenjo Kamuktaindet ne Toroor, “Ii weeriinnyu; kaasichin rani.

⁸ Sooma, si agoonin pororyosyek koek poroteng'ung', ak agoonin ole poochin ng'wony kobunjiin.

⁹ Itue icheek `kirokto ne po karnet; ak ituatui icheek ko uu rokyetap cheptereniot.”

¹⁰ Nooto anyun, osich utaatyet, okweek laitorinik; oneetkei, okweek kirwoogigap ng'wony.

¹¹ Oboisyechi Kamuktaindet ne Toroor eng' kaiyweisyet; ak oboiboitu eng' potanet.

¹² Oming'inityigei weeriit si ma nereech, ak olusye eng' ooreet, amu imuuchi konereech miising' eng' chokyinet. Iberuurotin icheek tugul che imang'u ineendet.