TIENWOGIKAL 19 - BUKUIT NE TILIIL Sireet ne Dutero Kanon

Toroornatetap Kamuktaindet eng' tuguuk che ki yai

Po ne oo eng' putiik. Tyendap Kalasunet ne po Daudi.

¹ Mwaitoi kipsengwet liilindap Kamuktaindet; ibartoi soet poisyonigap eunekyik.

² Mwachin `peetuut peetuut age ng'olyoot, iboorchin `kemout kemout age naet.

³ Ma mi ng'alaalet anan ng'aleek; ma kigasei tweguunennywa.

⁴ Itei kutinnywa ng'wony komugul, ak itei ng'aleekwak ole poochin ng'wony. Ki inde emait eng' chooto agobo asiista,

⁵ ko uu sandet ne mang'une koonnyi, ak kobaibai ko uu chii ne kiim ne labati eng' kabeletapkei.

⁶ Itei chorunennyi tabandap kipsengwet, ak itei yiemutyennyi tabanwegap kipsengwet; ma mi kiy ne ung'egei maannyi.

Ng'atuutyetap Kamuktaindet ne Toroor

⁷ Ititaat ng'atuutyetap Kamuktaindet ne Toroor, ak koweechi saboondo. Po iman paornateetap Kamuktaindet ne Toroor, igoochin utaatyet chii ne yetyet.

⁸ Lititen kaneetisyosyegap Kamuktaindet ne Toroor, iboiboi muguleldo. Tiliil ng'atuutyetap Kamuktaindet ne Toroor, indoi lapkeiyet koonyek.

⁹ Tiliil kaiyweisyet ne kiywei Kamuktaindet ne Toroor, ak kotebyei koigeny. Po iman kirwoogutigap Kamuktaindet ne Toroor, ak tinyei imanda tugul.

¹⁰ Chooto che kemachei kosiir thahabu, kosiir thahabu che chaang' che tiliileen. Siirei anyinyindanywa kumyat, siirei kumyat ak masamek.

¹¹ Kogeny eng' chooto kitigoni otwogeng'ung'; miitei melekto ne oo ngeriip chooto.

¹² Ng'oo ne imuuchi koguiyo lelutikyik? Itiliila eng' tuguuk che ung'ootiin.

¹³ Keer otwogeng'ung' si ma yai tuguuk che po menoteet; amegoochi koboiywa. Si aek ne ititaat, si atyagak eng' pistoet ne oo.

¹⁴ Ng'aleegap kutinnyu ak kabwaatutigap muguleldanyu, ko ingochamak eng' taing'ung' ee Kamuktaindet ne Toroor, rwandennyu ak ko katyagindennyu.