TIENWOGIKAL 18 - BUKUIT NE TILIIL Sireet ne Dutero Kanon

Tyendap katerteeret

Po ne oo eng' putiik. Tyendap Kalasunet ne po Daudi ne kityenji Kamuktaindet ne Toroor ye kingo sar ineendet eng' eutap Saulo ak puunikyik alak

¹ Achamin, ee Kamuktaindet ne Toroor, kimnateennyu.

² Kamuktaindet ne Toroor ko rwandennyu, irimennyu ak saruunindennyu; Kamuktaindennyu, rwandennyu ne kiim, amang'u ineendet; long'ennyu, kuinetap yetunennyu ak teeksennyu ne kooi.

³ Aguure Kamuktaindet ne Toroor, ne nyoljin kilas, si kesarwo eng' puunikyuk.

⁴ Ki alachan poroonigap meet, ak ki imua maraneetap yaityet.

⁵ Ki yiema poroonigap ye mi che ki kobek, kichea mestonogap meet.

⁶ Eng' pichiindanyu ko ki aguur Kamuktaindet ne Toroor, ki ariirchi Kamuktaindennyu ale kotoreta. Ki kas kutinnyu eng' hekalunnyi, ak kiit itiikyik riirekyuk.

⁷ Ki kirgiren ng'wony anyun ak kobotan, kitwagei lumeiywegap tuloonook, ak kotumdumgei, amu kinereech.

⁸ Ki togostae iyeto seruunekyik, ak kibeelso maat ne ki mang'une kutinnyi; kilalyo nesek eng' maata.

⁹ Ki im kipsengwet ak icheek, ak kochoorgei ineendet; kimi mesundeito ne oo kururetap keelyekyik.

¹⁰ Ki laany kerubindet, ak kotiriren; kitiriren anyun kochaakta eng' kebebaigap usoonet.

¹¹ Ki yai mesundeito koek emainnyi ne mi komoswekyik tugul, imenindap peek, poolik che tuuen che po parak.

¹² Eng' kaluunet ne ki mi tainnyi, ko ki pun polikyik che tuuen, koigap ropta ak ng'etetyot.

¹³ Kitul Kamuktaindet ne Toroor eng' kipsengwet, ak kitwek Ineendet Ne Toroor Miising', kobiit koigap ropta ak ng'etetyot.

¹⁴ Ki iyookto kipchabonikyik, ak koiyesta; ki ilyelyo kalyelosyek ng'iisyat, ak konyaliil icheek.

¹⁵ Ki took anyun kereruusyegap peek, ak king'ang'agis lumeiywegap ng'wony, ye ki iger kong' inyee, ee Kamuktaindet ne Toroor, eng' cheetap kabuusetap seruneguk.

¹⁶ Ki iyook eunnyi eng' parak, ak koganaba; ki ichuutwa among' eng' peek che chaang'.

¹⁷ Kisarwo eng' punyondennyu ne kiim, ak eng' icheeget che kiwecha; amu ki kiimeen kosiiro.

¹⁸ Kichea eng' peetuutap nyalildanyu, ago ki ek Kamuktaindet ne Toroor ne atiegei.

¹⁹ Ki imuta amanda awo ole paraa; kisarwo, amu ki paibait eng' anee.

²⁰ Ki koono Kamuktaindet ne Toroor ko uu imandanyu; ki koono ko uu tiliilindap eunekyuk.

²¹ Amu ki ariip ortinwegap Kamuktaindet ne Toroor, ak ma abagaakte Kamuktaindennyu eng' oor ne ya.

²² Amu kimi tainnyu kirwoogutikyik tugul, ak ki ma aiste kaneetisyosyekyik.

²³ Ki ageesunotkei eng' tainnyi, ak ki ariipkei si ma nama tengekto.

²⁴ Ki koono anyun Kamuktaindet ne Toroor ko uu imandanyu, ko uu tiliilindap eunekyuk eng' tainnyi.

²⁵ Eng' che tinyei rireenetapkei ii po rireenetapkei; ak eng' chiito ne ititaat ibartoige ile ii ititaat.

²⁶ Eng' che tiliileen ibartoige ile ii tiliil, ak eng' che mastoi, obortosi.

²⁷ Amu isaru che nyerootiin, ago iming'ini che mendos.

²⁸ Amu inaami tainnyu; ikweng'wa Kamuktaindet ne Toroor Kamuktaindennyu mesundeitonyu.

²⁹ Amu aiyestoi lugeet eng' inyee; eng' Kamuktaindennyu atorombeni asiire irimeet.

³⁰ Ititaat ooreetap Kamuktaindet; naat ng'olyootap Kamuktaindet ne Toroor; Ineendet long'eetap icheeget tugul che imang'u.

³¹ Amu tos ng'oo Kamuktaindet, kobatee Kamuktaindet ne Toroor? Ak tos ng'oo rwandet, kobatee Kamuktaindennyo?

³² Ineendet Kamuktaindet ne ratwa kimnateet, ak koyaei ooreennyu koek ne ititaat.

³³ Yaei ineendet keelyekyuk koigei che po kenyeleet, ak nama atonon eng' komoswekyuk che sutotin.

³⁴ Ineeti eunekyuk koyai lugeet, si kong'i eunekyuk kwanget ne po sugunwet.

³⁵ Ki igoono long'eetap yetuneng'ung' agine; ki kotiia eung'ung' ne po tai, ak ki koeeta talasyeng'ung'.

³⁶ Ki ibaraiywa kakwautikyuk, ama ichabaita keelyekyuk.

³⁷ Aoone puunikyuk agoi anam: amaweechigei agoi kowong'kei.

³⁸ Atue kot koma komuuchi kong'eetyo; ibutyin icheek keelyekyuk keel.

³⁹ Amu ki iratwa kimnateet ne po lugeet; ki iterteerwa aboi che king'eetya.

⁴⁰ Ki iwelel puunikyuk kotuktocha patai, si kobiit awong' icheek che wecho.

⁴¹ Ki riiryo, ago ki ma piit ne ki sar; ki riirchi Kamuktaindet ne Toroor, ago ki ma wolji.

⁴² Ki atonaton eng' nooto komengegitu koigei temburyek che ibei usoonet; ki awaste ko uu ng'atateek che mi ortinwek.

⁴³ Ki isarwo eng' pooryosyegap piik; ki igoono aek metitap pororyosyek. Tuun ota piik che tomo anai.

⁴⁴ Ye kas agobo anee, eng' yooto kogasa iit; tuun kasa iit toek eng' ng'aalseet.

⁴⁵ Pegunoti toek kowandogei, ak komong' eng' ole ung'egei kobotandos.

⁴⁶ Sabei Kamuktaindet ne Toroor! Iberuurot rwandennyu, ingotororit Kamuktaindet ne po yetunennyu.

⁴⁷ Kamuktaindet ne yaaktoiywo mugetuut, ak yaei piik kogasa iit.

⁴⁸ Sarwo ineendet eng' puunikyuk; ee, itoroora asiir icheek che ng'eetyina, isarwo eng' chiito ne koroom.

⁴⁹ Eng' niito aweegun kongoi anyun, ee Kamuktaindet ne Toroor, eng' kwenutap pororyosyek, ak atyenji kaineng'ung' kalasunoik.

⁵⁰ Igoochin laitoryandennyi saruunet ne oo; ak koboorchin nenyi ne iilaat chamyennyi ne tala, Daudi ak iyotennyi agoi koigeny.