TIENWOGIKAL 17 - BUKUIT NE TILIIL Sireet ne Dutero Kanon

Saaetap chii ne po iman

Saaetap Daudi

¹ Kas imanda, ee Kamuktaindet ne Toroor, epchi iit riirekyuk; ingogas iting'ung' saaennyu, ne ma mang'une kutitap ng'aalseet.

² Ingomong' kirwoogennyu eng' ole imi; ingogeer konyeguk tugul che nyolunotin.

³ Ki ityem muguleldanyu; ki inyoonjo kemoi, ki isyacha, ama inyoorcha kiy; ki abekyi ale ma mwaei kutinnyu pistoet.

⁴ Ago eng' poisyonigap piik, ko ki ariipkei amu ng'olyoot ne punu kuting'ung', si masup ortinwegap rebiik.

⁵ Ki konamgei tyegutikyuk ak ortinweguk, ama ichabaita keelyekyuk.

⁶ Kaguurin, amu iwolwoo, ee Kamuktaindet; epcha iit, kas ng'alaalennyu.

⁷ Ibooru chamyeng'ung' ne tala ne kikwong'ee, inyee ne isaru icheek che imang'un, eng' puunikwak eng' eung'ung' ne po tai.

⁸ Riibo ko uu laptetap konda, ung'ena urwetap kebebaiguk,

⁹ si ma twaa kiptengeginik che usa, puunikyuk che koroomen che ki yiema.

¹⁰ Kager icheeget mugulelwekwak agobo riirge; ng'alaale menoteet kutusweekwak.

¹¹ Kagoalachech komoswek tugul; kagochiiljech kong' si kowiirchech ng'wony.

¹² Kergei ineendet ak ng'etundo ne machei kochumji kiit ne amei, uu neraneetap ng'etundo ne ribisi eng' komoswek che ung'ootiin.

¹³ Ng'eet, ee Kamuktaindet ne Toroor, torookte, wiirchi ng'wony, saru saboondanyu eng' kiptengekyot, eng' rotweng'ung' po chok.

¹⁴ Ee Kamuktaindet ne Toroor, eng' eung'ung' isarwo eng' piik, eng' piik che po ng'wony, che ting'ee kebebertanywa sabooni. Che inyiiti `inyee mootinwekwak konoraiguk, tinyei icheek lagok che yamei, ak pagaakyin tuguukwak lagokwak.

¹⁵ Ago ageere anee togeng'ung' eng' imanda; abiyonyi itoondong'ung' ye ang'eete.