TIENWOGIKAL 16 - BUKUIT NE TILIIL Sireet ne Dutero Kanon

Saaet agobo riipseet

Tyendap Kalasunet ne po Daudi.

¹ Riibo, ee Kamuktaindet; amu amang'un.

² Kaaleenji Kamuktaindet ne Toroor, “Ii Kiptaiyandennyu; ma tinye myeein age kobatenen inyee.”

³ Ago eng' che tiliileen che mi ng'wony, chooto ko che tagunoot, che mi poiboiyennyu tugul eng' icheek.

⁴ Icheeget che leweni kamuktain age ko tesoksei nyalilwogikwak; ma tumdoi anee kagoochinoikwak che kieei che po korotiik, anan amwa kainaikwak eng' kutinnyu.

⁵ Kamuktaindet ne Toroor ko kebebertap porotennyu ak ne po kigombennyu; iname parbaryandennyu.

⁶ Kagokwaiywa komoswek che myachen; ee, atinye poroteet ne myee.

⁷ Alasu Kamuktaindet ne Toroor ne ki ing'omita; ee, ineeta muguleldanyu agot kemoi.

⁸ Kande Kamuktaindet ne Toroor tainnyu peetuusyek tugul; amu mi ineendet eunnyu ne po tai, ma ki istaa.

⁹ Paibai muguleldanyu amu nooto, ak kogasegei saboondanyu; tebyei poortanyu agine eng' chametapkei.

¹⁰ Memetoi saboondanyu eng' ye mi meet; amechamjini kogeer neng'ung' ne tiliil nunet.

¹¹ Iboorwo ooreetap saboondo; mi kagasetapkei taing'ung' ne nyiitaat, mi eung'ung' ne po tai che kechamei agoi koigeny.