TIENWOGIKAL 149 - BUKUIT NE TILIIL Sireet ne Dutero Kanon

Kalasunet agobo myeeindap Kamuktaindet

¹ Olasu Kamuktaindet ne Toroor! Otyenji Kamuktaindet ne Toroor tyendo ne leel, ak kalasunennyi eng' tuiyetap che tiliileen.

² Ingobaibait Israel eng' yaindennyi; ingogaskei lagogap Zion eng' Laitoryandennywa.

³ Ingolas kainennyi ye urerendos, ingotyenji ineendet kalasunoik eng' sugutit ne ming'in ak ketubet.

⁴ Amu paibai Kamuktaindet ne Toroor eng' piikyik; igororoni eng' yetunet che iming'inegei.

⁵ Ingoboiboitu che tiliileen eng' telunateet; ingotyenso eng' poiboiyet eng' itogusyekwak.

⁶ Ingotebee kutusweekwak kalasunoik che eecheen che po Kamuktaindet, ak ingotebee eunekwak rotwetap chok ne ng'atip komoswek tuwai;

⁷ si kobiit koyaakyi mugetuut pororyosyek, ak pireet ne pirei piik;

⁸ korat laitorinikwak eng' nyororosyek, ak korat eng' mugurek che po kariik chechwaak che taagunotiin,

⁹ ak korwookyine kirwooget ne siraat. Tinyei teegisi chechiik tugul che tiliileen. Olasu Kamuktaindet ne Toroor!