TIENWOGIKAL 148 - BUKUIT NE TILIIL Sireet ne Dutero Kanon

Ingolas yaet komugul Kamuktaindet

¹ Olasu Kamuktaindet ne Toroor! Olasu Kamuktaindet ne Toroor eng' kipsengwet; olasu ineendet eng' komoswek che torooreen.

² Olasu ineendet, okweek malaikaisyekyik tugul; olasu ineendet, okweek lugosyekyik tugul.

³ Olasu ineendet, okweek asiista ak arawet; olasu ineendet, okweek kecheik tugul che oo po lapkeiyet.

⁴ Olasu ineendet, okweek kipsengwetisyegap kipsengwet, ak okweek peek che omi paragutap kipsengwet.

⁵ Ingolas icheek kainetap Kamuktaindet ne Toroor, amu ki ng'at, ak ki yaogis.

⁶ Kigogimiit `inee chooto kotebi koigeny ak koigeny; ki koyai ng'atuutyet ne ma igeesugei.

⁷ Olasu Kamuktaindet ne Toroor eng' ng'wony, okweek maswetisyek ak rirosyek tugul.

⁸ Olasu maat ak koiyat, teluji ak kibungweret; ak kipchurchuryet ye osuldochini ng'olyoondennyi.

⁹ Olasu okweek tuloonook ak tuloonook che mengeechen; keetiik che iytos, ak taragonik tugul!

¹⁰ Tyong'ik ak tuuga tugul; tuguuk che ichuutegei ng'wony ak toriitik che tirirendos!

¹¹ Laitorinigap ng'wony ak pororyosyek tugul; pounik ak kirwoogik tugul che po ng'wony!

¹² Murenik ak tiibiik; poisyek ak lagok!

¹³ Ingolas icheek kainetap Kamuktaindet ne Toroor; amu kainennyi ineegei ne itoroorot: siirei toroornatennyi ng'wony ak kipsengwet.

¹⁴ Ak ki kotoroor kuinetap piikyik, kalasunetap piikyik tugul che tiliileen; agot lagogap Israel, piik che neegitee ineendet. Olasu Kamuktaindet ne Toroor!