TIENWOGIKAL 147 - BUKUIT NE TILIIL Sireet ne Dutero Kanon

Kalasunet agobo perurto ne po Kamuktaindet

¹ Olasu Kamuktaindet ne Toroor! Myee ne tya ketyenji Kamuktaindennyo kalasunoik; amu karaaran, ak nyoljin tyendap kalasunet.

² Teechei `Kamuktaindet ne Toroor Jerusalem; iyumi ineendet che ki kioon che po Israel.

³ Inyai che ilyotiin mugulelwekwak, ak koratei mookwak.

⁴ Iiti kecheik ole tee; tochin icheek tugul kainaik.

⁵ Oo Kiptaiyandennyo, ak tinyei kimnateet ne oo kosiir; ma kimuuchi ketet ng'omnatennyi.

⁶ Tiiei Kamuktaindet ne Toroor che iming'inegei; ago chooru kiptengeginik kobwa ng'wony.

⁷ Otyenji Kamuktaindet ne Toroor kobooto kagoitoetap kongoi; otyenji Kamuktaindennyo kalasunoik eng' ketubet.

⁸ Tugee inee poolik kipsengwet, chopchin ropta ng'wony, ak ibiti susweek eng' tuloonook.

⁹ Igoochin `inee amitwogik tyong'ik, ak chepkuginik che iteeitos.

¹⁰ Ma paibai ineendet eng' kimnateetap paraisiit, ama paibai eng' labatindet;

¹¹ ago paibai Kamuktaindet ne Toroor eng' icheek che iywei ineendet, eng' icheeget che imang'u rireenennyi.

¹² Ilasu Kamuktaindet ne Toroor, ee Jerusalem! Ilasu Kamuktaindeng'ung', ee Zion!

¹³ Amu igimiti `inee temeleiywegap ormariichoguk; iberuuri lagoguk eng' kwenung'ung'.

¹⁴ Yaei kaalyeet eng' kiwotosyeguk; inyiitin nganuuk che neryootiin kosiir.

¹⁵ Iyookyin ng'wony ng'atuutyennyi; ak labati ng'olyoondennyi miising'.

¹⁶ Koonu teluji ko uu koroorigap keechiirek; iseeroti chepkoset ko uu oreek.

¹⁷ Iyooktoi peekyik ko uu koik ng'oo ne imuuchi kotonon eng' taitap kaitityennyi?

¹⁸ Iyooktoi ng'olyoondennyi, ak koyaei tuguuchooto kochootyo; yaei usoonennyi kous, ak koroot peek.

¹⁹ Iboorchin Jakobo ng'olyoondennyi, iboorchin Israel ng'atuutikyik ak kirwoogutikyik.

²⁰ Ma yachin pororyet age tugul ko uu nooto; ama nai icheek kirwoogutikyik. Olasu Kamuktaindet ne Toroor!