TIENWOGIKAL 146 - BUKUIT NE TILIIL Sireet ne Dutero Kanon

Kalasunet agobo toretetap Kamuktaindet

¹ Olasu Kamuktaindet ne Toroor. ilasu Kamuktaindet ne Toroor, ee saboondanyu.

² Alasu Kamuktaindet ne Toroor kota asabe; atyenjini Kamuktaindennyu kalasunoik kotee asabe.

³ Amat omang'u pounik, anan weeriitap chii, ne ma mi toreteet eng' ineendet.

⁴ Mandoi kabusennyi, weekyingei ng'ung'unyekyik; petos kabwaatutikyik eng' peetuunooto.

⁵ Paibai chii ne Kamuktaindetap Jakobo ko toreteennyi, ne mi kamuung'ennyi Kamuktaindet ne Toroor Kamuktaindennyi,

⁶ ne ki yai kipsengwet ak ng'wony, nyanjet, ak tugul che mi olooto; ne riibei imanda koigeny;

⁷ ne irwooksechinechin che kiusei: ne igoochin amitwogik che amei rubeet. Ityachi Kamuktaindet ne Toroor che ratotiin;

⁸ yaatei Kamuktaindet ne Toroor konyegap che koryotiin. Ing'eeti Kamuktaindet ne Toroor che ing'uruuksei; chamei Kamuktaindet ne Toroor icheek che po iman.

⁹ Riibei Kamuktaindet ne Toroor toek; tiiei ne ma tinyei sigiik ak mosoget; ago igabui `inee ooreetap kiptengekyot.

¹⁰ Laitorani Kamuktaindet ne Toroor koigeny, laitorani Kamuktaindeng'ung' eng' ibinwek tugul, ee Zion. Olasu Kamuktaindet ne Toroor!