TIENWOGIKAL 143 - BUKUIT NE TILIIL Sireet ne Dutero Kanon

Saaet agobo saruunet eng' puunik

¹ Kas saaennyu, ee Kamuktaindet ne Toroor! Epchi iit soomutikyuk, wolwo eng' imandang'ung' ak lititindang'ung'.

² Amerwookyi otwogindeng'ung'; amu ma mi chii ne sabei ne kiityin imanda eng' taing'ung'.

³ Amu kigous puunyoot saboondanyu; kigokwer saboondanyu kobutyi ng'wony, kigo koono ameng'oot ole imen, ko uu che ki kobek keny.

⁴ Kigo tanui amu saboondanyu eng' oriit; kaek muguleldanyu kipkuberet eng' oriit.

⁵ Abwaatati peetuusyek che po keny; aruchinoti poisyoniguk tugul, aruchinoti poisyonigap euneguk.

⁶ Atokyinin eunekyuk; amei melelda saboondanyu agobo inyee ko uu emet ne yaamaat.

⁷ Chokyi wolwo, ee Kamuktaindet ne Toroor; ichuchui saboondanyu. Ameung'ena togeng'ung'; si ma ige icheek che choorchingei keriinget.

⁸ Koono agas chamyeng'ung' ne tala karon; amu amang'un. Koono anai ooreet ne abune; amu atokyinin saboondanyu.

⁹ Sarwo, ee Kamuktaindet ne Toroor, eng' puunikyuk; amwechinin iunya.

¹⁰ Ineeta ayai mageng'ung'; amu inyee ko ii Kamuktaindennyu. Myee kabuuseng'ung'; ingondoiywa eng' emetap lititindo.

¹¹ Isooba, ee Kamuktaindet ne Toroor, amu kaineng'ung'. Imoong'u saboondanyu eng' nyalilda amu imandang'ung'.

¹² Ak ing'eti puunikyuk eng' chamyeng'ung' ne tala, ak ing'em icheek tugul che inyalili saboondanyu; amu aa kiboityondeng'ung'.