TIENWOGIKAL 142 - BUKUIT NE TILIIL Sireet ne Dutero Kanon

Saaet agobo saruunet eng' usiisyet

¹ Ariirchini Kamuktaindet ne Toroor eng' kutinnyu; atwekyini Kamuktaindet ne Toroor aipchini soomennyu.

² Aroong'jini tainnyi riirekyuk; aboortoi eng' tainnyi nyalildanyu.

³ Ye kingo tanui saboondanyu, inai ooreennyu. Kigouny icheek mesteet agobo anee eng' ooreet ne abune.

⁴ Kusyi kong' eunnyu ne po tai, ak igeer; amu ma mi chii ne ingeno; ki kobetwa ole amwechini, ma mi chii ne riibei saboondanyu.

⁵ Ariirchin inyee, ee Kamuktaindet ne Toroor; ki amwa ale, “Ii oldanyu ole amwechini, ii kebebertanyu eng' emetap che saptos.”

⁶ Epchi iit riirekyuk, amu kinyerata miising'; sarwo eng' usiikyuk, amu kiimeen kosiiro.

⁷ Imoong'u saboondanyu eng' korgoreet, si aweekyi kongoi kaineng'ung'. Yiema che po iman komoswekyuk tugul, amu iyaiywo eng' aiyebindo.