TIENWOGIKAL 141 - BUKUIT NE TILIIL Sireet ne Dutero Kanon

Saaet agobo riibseet eng' yaityet

¹ Kaaguurin Kamuktaindet ne Toroor; chogu nyoonjo; epchi iit kutinnyu ye aguurin.

² Ingotogosta saaennyu ko uu nyamdutik eng' taing'ung'; ingoigei eunekyuk che anamjini parak korosyot ne po koskoleny.

³ Nde riibindet kutinnyu, ee Kamuktaindet ne Toroor; riip kurgeetap kutinnyu.

⁴ Ametokyi muguleldanyu kiy age tugul ne ya, koyai poisyonigap tengekto kobooto piik che yaei tengekto; amechamwo aam tuguukwak che anyiny.

⁵ Ingobira ne po iman, si koek nooto ne myee. Mechamji mwaita ne po kiptengeginik koiil metinnyu; amu ma metoi asa agirinda tengekwogikwak.

⁶ Ye ki kitoorta kirwoogikwak kong'irtae rwandet, kogas anyun kole anyinyen ng'aleekyuk.

⁷ Ko uu ye ibati chiito ng'wonyut ak kogereeri, ko uu nooto iseeroksei kawekyok eng' kutitap kererit.

⁸ Amu inyalin konyekyuk, ee Kamuktaindet ne Toroor, Kiptaiyandennyu; amang'un inyee; amegoochi saboondanyu konyalil.

⁹ Riibo si ma nama mesteet ne ki riich icheek agobo anee, ak mestonogap yaigap yaityo.

¹⁰ Ingobutyi kiptengeginik mestonokwak, ye achilili.