TIENWOGIKAL 140 - BUKUIT NE TILIIL Sireet ne Dutero Kanon

Saaet agobo riibseetap Kamuktaindet

¹ Sarwo, ee Kamuktaindet ne Toroor, eng' chiito ne ya; riibo eng' chiito ne koroom;

² che ibwaati yaitwogik eng' mugulelwekwak; iyomdoskei kotugul agobo lugeet.

³ Ki kolit ng'elyebwekwak ko uu ereneet; miitei ng'wonetap erenook kutusweekwak.

⁴ Riibo, ee Kamuktaindet ne Toroor, eng' eunegap kiptengekyot; riibo eng' chiito ne koroom ne pekyinot kotoorta.

⁵ Kigouny menotik mesteet agobo anee, ak poroonik; kigoiito mesteet ne uu regereiywot eng' ooreet taban; ki koriich mestonok agobo anee.

⁶ Ki aleenji Kamuktaindet ne Toroor, “Inyee ko ii Kamuktaindennyu.” Epchi iit soomutikyuk che punu kutinnyu, ee Kamuktaindet ne Toroor.

⁷ Ee Kamuktaindet ne Toroor, Kiptaiyandennyu, kimnateetap yetunennyu, ki ituch metinnyu eng' peetuutap lugeet.

⁸ Amegoochi kiptengeginik tuguuk che machei, ee Kamuktaindet ne Toroor; ametoret konyoor magennyi ne ya; si ma yaigei koeegitu.

⁹ Ago ingotuch metowegap icheeget che yiema, yaityetap kutusweekwak.

¹⁰ Ingobutyi icheek ng'etetyot! ingewiirchi icheek rirosyek, si mata kong'eetyo kogeny.

¹¹ Ma kigimiti chiito ne po ng'aleek che yaach eng' emet; cheeng'ei yaityet chiito ne koroom, si koterteer ineendet.

¹² Angen ale toreti Kamuktaindet ne Toroor ng'aleegap ne kinyaliili, ak kiit ne nyoljin ineendet ne panani.

¹³ Iman, igoochin kongoi kaineng'ung' piik che po imanda; menyei taing'ung' che lititen.