TIENWOGIKAL 139 - BUKUIT NE TILIIL Sireet ne Dutero Kanon

Ingen Kamuktaindet tuguuk tugul

¹ Ee Kamuktaindet ne Toroor, ki isyacha ak ki inaa.

² Ingen ye atebye ak ye ang'eete, ingen kabwaatutikyuk agot ngimi ole loo.

³ Isyachi ooreennyu ak ole arue, ak ingen ortinwekyuk tugul.

⁴ Amu ma mi ng'olyoo ng'elyeptannyu, keero, ingen inyee tugul, ee Kamuktaindet ne Toroor.

⁵ Ki iyiema tai ak let, ak ki igonoora eung'ung'.

⁶ Po kwong'eet ne oo eng' anee, ng'omnateet ne uu nooto; toroor miising', ma muuchi aityi.

⁷ Awendi ano aistoegei Kabuuseng'ung' ne Tiliil? Anan amwechini ano ole memi?

⁸ Ngatogoste kipsengwet, imi olooto; agot ngaite itogunnyu eng' ye mi che ki kobek, keero, imi olooto.

⁹ Ngaip kebebaigap karon, ak awe atebee tabanwegap nyanjet;

¹⁰ agot eng' olooto kondoiywa eung'ung', ak nama eung'ung' ne po tai.

¹¹ Ngot amwa ale, “Tucha mesundeito iman, ak ngale koek lapkeiyet ne yiema, kemout, ”

¹² ko agot mesundeito, koma ung'enengei, ago iluu kemout ko uu peet; kergei mesundeito ak lapkeiyet eng' inyee.

¹³ Amu inyee ne ki iyai saboondanyu; ki itucha eng' moetap kamennyu.

¹⁴ Aweegun kongoi, amu ki kiyaa eng' ooreetap kaiyweisyet, ak eng' kwang'utyet. Kwang'utik poisyoniguk. ak ingen saboondanyu ng'olyoondonooto komyee.

¹⁵ Ma ung'enenge poortanyu, ye ki kiyaa eng' ung'oot, ak ye ki kimimia eng' ng'omnateet eng' ng'wony oriit.

¹⁶ Ki keer konyeguk poortanyu kotom kosulda, ki kisirchi bukuing'ung' kebeberwekyuk tugul, che ki kiyaei peetuut age tugul, ye kitom kobiit agot agenge eng' icheek.

¹⁷ Korooron ne tya kabwaatutiguk che iting'ena, ee Kamuktaindet! Eechen ne tya icheek tugul ko kagiyomo!

¹⁸ Nda aiiti icheek, ko chaang' kosiir ng'aniek; ye agosu, kota ami kobooten.

¹⁹ Iman, ibare kiptengeginik, ee Kamuktaindet: Oistoenage anyun, okweek piik che tumdoi korotiik.

²⁰ Amu mwaei icheek tengekto agobo inyee, ak mwaei kaineng'ung' puch puuniguk.

²¹ Ee Kamuktaindet ne Toroor, tos ma weche icheek che wechin? Ak ma nereekyini icheek che ng'eetyinin?

²² Aweche icheek konyi; aiiti icheek ale puunikyuk.

²³ Isyacha, ee Kamuktaindet, ak inai muguleldanyu; tyema, ak inai kabwaatutikyuk.

²⁴ Keer ngo mi oor age tugul ne po tengek eng' anee, ak indoiywa eng' ooreet ne po koigeny.