TIENWOGIKAL 138 - BUKUIT NE TILIIL Sireet ne Dutero Kanon

Saaetap kongoi

¹ Agoonin kongoi eng' muguleldanyu komugul; atyenun kalasunoik eng' taitap kanamonik.

² Agutunyi atokyinige hekalung'ung' ne tiliil, ak agoochini kaineng'ung' kongoi amu chamyeng'ung' ne tala amu imandang'ung'; amu ki ieet ng'olyoondeng'ung' kosiir kaineng'ung' komugul.

³ Ki iwolwoo eng' peetuut ne ki aguurin, ki igimita eng' kimnateet eng' saboondanyu.

⁴ Koonin kongoi laitorinik tugul che po ng'wony, ee Kamuktaindet ne Toroor, amu ki kogas ng'aleegap kuting'ung'.

⁵ Tyeni icheek agobo ortinwegap Kamuktaindet ne Toroor, amu oo toroornatetap Kamuktaindet ne Toroor.

⁶ Agot nga toroor Kamuktaindet ne Toroor, kogeerei ne nyeraat, ago ingen ineendet menotyot agot ngo mi ole loo.

⁷ Agot ngabunoti kwenutap nyalilda, ko inyee ne iriiba; iitoi eung'ung' igirindoe nereegegap puunikyuk; ak sarwo eung'ung' ne po tai.

⁸ Isuldaiwo Kamuktaindet ne Toroor tuguuk che nyoljino; tebyei rireeneng'ung' koigeny, ee Kamuktaindet ne Toroor; amebagaakte poisyonigap euneguk.