TIENWOGIKAL 137 - BUKUIT NE TILIIL Sireet ne Dutero Kanon

Riirek eng' toondon

¹ Eng' ngeguutap ainoosyegap Babilon, ko ki kitebee olooto ak ki kiriirtosi, ye kingi pwaati Zion.

² Eng' keetiik che po kereruusyegap emonooto ko ki kigartate ketubosyekyok.

³ Eng' olooto icheeget che kiluulech ko ki magenech tyenwogik, ak icheeget che ki inyalilech ko ki magenech poiboiyet, koleen, “Otyenwech tyendo agenge eng' tyenwogigap Zion!”

⁴ Kimuktoi ano ketyen tyendap Kamuktaindet ne Toroor eng' emet ne ki onon?

⁵ Ngot autyenen, ee Jerusalem, ko ingoek eunnyu ne po tai ne meat!

⁶ Ingonamgei ng'elyeptanyu ak kutit, ngot koma abwaatin, ngo ma achame Jerusalem kosiir poiboiyennyu ne siirtoot.

⁷ Ibwaat, ee Kamuktaindet ne Toroor, kiit ne ki yai piigap Edom peetuut ye ki kiluule Jerusalem; che kileen, “Obut! Obut! Agot oldanyi ole tonone kooriik!”

⁸ Ee, cheptap Babilon, ne tuun kiwong'un! Paibai ineendet ne igeerun ko uu ye ki iyaiywech!

⁹ Paibai ineendet ne namei manyuruniguk ak kowiire rwandet!