TIENWOGIKAL 136 - BUKUIT NE TILIIL Sireet ne Dutero Kanon

Tyendo ne po mwaetap kongoi

¹ Ogoochi Kamuktaindet ne Toroor kongoi, amu myee ineendet; amu tebyei rireenennyi koigeny.

² Ee oweekyi kongoi Kamuktaindet ne pou kamuktaik; amu tebyei rireenennyi koigeny.

³ Ee oweekyi kongoi Kiptaiyatap kiptainik; amu tebyei rireenennyi koigeny.

⁴ Ineendet ne yaei ineegei kwang'utik che eecheen; amu tebyei rireenennyi koigeny.

⁵ Ineendet ne eng' kaguiyet ko ki yai kipsengwet, amu tebyei rireenennyi koigeny;

⁶ ineendet ne ki iito ng'wonyut eng' peek parak, amu tebyei rireenennyi koigeny;

⁷ ineedet ne ki yai lapkeiyosyek che eecheen, amu tebyei rireenennyi koigeny;

⁸ asiista ne pou eng' peetuut, amu tebyei rireenennyi koigeny;

⁹ arawek ak kecheik che pou eng' kemoi, amu tebyei rireenennyi koigeny.

¹⁰ Ineendet ne ki pir Misiri eng' taiywekwak, amu tebyei rireenennyi koigeny;

¹¹ ak ki imut Israel komong' eng' kwenunnywa, amu tebyei rireenennyi koigeny;

¹² eng' euut ne kiim ak eng' euut ne chuulaat, amu tebyei rireenennyi koigeny;

¹³ ineendet ne ki pcheune aeng' Araraita ne Piriir, amu tebyei rireenennyi koigeny;

¹⁴ ak ki igoochi Israel kobun kwenunnyi, amu tebyei rireenennyi koigeny;

¹⁵ ago ki toorchi Pharaoh ak lugosyekyik Araraita ne Piriir, amu tebyei rireenennyi koigeny.

¹⁶ Ineendet ne ki indochi piikyik kobun surkwen, amu tebyei rireenennyi koigeny.

¹⁷ Ineendet ne ki pir laitorinik che eecheen: amu tebyei rireenennyi koigeny;

¹⁸ ak ki par laitorinik che taagunotiin, amu tebyei rireenennyi koigeny;

¹⁹ Sihon laitoryatap Amorik, amu tebyei rireenennyi koigeny;

²⁰ ak Og laitoryat Bashan, amu tebyei rireenennyi koigeny;

²¹ ak ki igoito emennywa koek poroteet, amu tebyei rireenennyi koigeny;

²² poroteetap kiboityondennyi Israel, amu tebyei rireenennyi koigeny.

²³ Ne ki ibwaatech eng' nyeraatyennyo, amu tebyei rireenennyi koigeny;

²⁴ ak ne ki ityaachech eng' puunikyok, amu tebyei rireenennyi koigeny.

²⁵ Ineendet ne igoochin amitwogik tugul che po tuguuk tugul che saptos, amu tebyei rireenennyi koigeny.

²⁶ Ee oweekyi kongoi Kamuktaindetap kipsengwet, amu tebyei rireenennyi koigeny.