TIENWOGIKAL 135 - BUKUIT NE TILIIL Sireet ne Dutero Kanon

Kalasunet agobo myeeindap Kamuktaindet

¹ Olasu Kamuktaindet ne Toroor! Olasu kainetap Kamuktaindet ne Toroor; olasu ineendet, okweek kiboitinigap Kamuktaindet ne Toroor,

² okweek che kotonondosi eng' kootap Kamuktaindet ne Toroor, eng' seremusyegap kootap Kamuktaindennyo.

³ Olasu Kamuktaindet ne Toroor; amu myee Kamuktaindet ne Toroor: otyenji kainennyi kalasunoik amu myee inee.

⁴ Amu ki kolewenjigei Kamuktaindet ne Toroor Jakobo, ak Israel koek kinnyi ne nenyi iman.

⁵ Amu angen ale oo Kamuktaindet ne Toroor; ak siirei Kiptaiyandennyo kamuktaik tugul.

⁶ Ki koyai Kamuktaindet ne Toroor kiit age tugul ne chamei, eng' kipsengwet ak eng' ng'wony, eng' nyanjosyek ak rirosyek tugul.

⁷ Igoochin kibungweret kotogosta kong'etee ole poochin ng'wony; yachin ropta kalyelosyek; imoong'u usoonet eng' konoraikyik.

⁸ Ne ki par kiboretook che po Misiri, che po piik ak che kitwatei che kiyagi.

⁹ Ki iyookto kaboorunoik ak kwang'utik koba kwenung'ung', ee Misiri, kobwonji Pharaoh ak otwogikyik tugul.

¹⁰ Ne ki pir pororyosyek che chaang', ak ki par laitorinik che kiimeen:

¹¹ Sihon laitoryatap Amorik, ak Og laitoryatap Bashan, ak laitornatosyek tugul che po Kanaan.

¹² Ak ki igoito emennywa koek poroteet, poroteetap piikyik Israel.

¹³ Tebyei kaineng'ung' koigeny, ee Kamuktaindet ne Toroor; tebyei kabwaateng'ung' eng' ibinwek tugul, ee Kamuktaindet ne Toroor.

¹⁴ Amu irwooksechin `Kamuktaindet ne Toroor piikyik, ak koriiregei kiboitiinikyik.

¹⁵ Kanamonigap pororyosyek ko po fedha ak thahabu. poisyetap eunegap piik.

¹⁶ Tinyei kutusweek, ago ma twegu; tinyei koonyek, ago ma keertoi.

¹⁷ Tinyei itiik, ago ma kastoi; ama mi kabuuset eng' kutusweekwak.

¹⁸ Kergeitu icheeget che kiyaei, ak tuguuchooto; ee, age tugul ne imang'u icheek.

¹⁹ Ee kootap Israel, olasu Kamuktaindet ne Toroor! Ee kootap Aron, olasu Kamuktaindet ne Toroor!

²⁰ Ee kootap Lawi, olasu Kamuktaindet ne Toroor! Okweek che oiywei Kamuktaindet ne Toroor, olasu Kamuktaindet ne Toroor!

²¹ Iberuurot Kamuktaindet ne Toroor eng' Zion, ineendet ne menyei Jerusalem. Olasu Kamuktaindet ne Toroor!