TIENWOGIKAL 132 - BUKUIT NE TILIIL Sireet ne Dutero Kanon

Meng'otetap Kamuktaindet ne po koigeny

¹ Ee Kamuktaindet ne Toroor, ibwaat agobo Daudi ibwaat nyalilwogikyik tugul che ki nyoor;

² Ko uu ye ki iyasyechi Kamuktaindet ne Toroor, ak ki iarorchi Ineendet Ne po Kamuktaet ne po Jakobo, koleenji:

³ “Iman, ma wendi emait oriit ne po koonnyu, anan atogoste itogunnyu;

⁴ ma kere konyekyuk eng' rwondo, anan anuuch;

⁵ agoi acheeng'ji Kamuktaindet ne Toroor oldo, meng'ootetap Ineendet Ne po Kamuktaet ne po Jakobo.”

⁶ Ogeero, kigegas agobo nooto eng' Ephratah; ki kinyoorchi keeweet ne mi timiin.

⁷ Kibendi meng'otosyekyik; kigutunyi eng' ng'echereetap keelyekyik keel.

⁸ Ng'eet, ee Kamuktaindet ne Toroor, ui ole imuung'ee; inyee ak moingetap kimnateng'ung'.

⁹ Ingolaach tisiiguk imanda; ak ingogaskei eng' kutit ne oo eng' poiboiyet cheguuk che tiliileen.

¹⁰ Amewelel togeetap neng'ung' ne iilaat amu kiboityondeng'ung' Daudi.

¹¹ Ki iyasyechi Kamuktaindet ne Toroor Daudi eng' iman; ma weechegei let: Andoi age ne punu poortang'ung' kotebee ng'echereeng'ung' ne po pounatet.

¹² Ngot koriip lagoguk arorutyennyu ak pounatennyu ne tuun aneeti, kotebee anyun lagokwak ak icheek ng'echereeng'ung' ne po pounateet agoi koigeny.

¹³ Amu ki kolewen Kamuktaindet ne Toroor Zion; kimakyigei koek ole tebee.

¹⁴ Yuto ko komosta ole amuung'e koigeny; atebee yuto; amu ki amach.

¹⁵ Aberuuri miising' amitwogikyik; abae kibananookyik amitwogik kot kobiyong'so.

¹⁶ Alaakyini tisiikyik ak icheek yetunet; ak kogaskei eng' kutit ne oo eng' poiboiyet chechiik che tiliileen.

¹⁷ Ayae eng' olooto kuinetap Daudi kong'at; ki achop tait agobo nenyu ne iilat.

¹⁸ Alaakyini puunikyik kalilanet; ago tuneni eng' ineendet naaryeennyi ne po pounateet.