TIENWOGIKAL 129 - BUKUIT NE TILIIL Sireet ne Dutero Kanon

Saaet agobo kiterteer puunik

¹ “Kigonyaliila icheek konyil che chaang' kobooch ko aa ming'in” Ingomwa Israel nguno kole,

² “Kigonyalila icheek konyil che chaang' kobooch ko aa ming'in, ago ki ma iterteera.

³ Ki ibat patennyu kabotik; kigereer kererchosyek koeegitu.”

⁴ Po iman Kamuktaindet ne Toroor; kigong'eti poroonigap kiptengeginik.

⁵ Ingolilanso ak koweekyigei let, icheek tugul che wechei Zion.

⁶ Ingoigei icheek susweek che mi kooriik parak, che restos kotom koeegitu,

⁷ che ma inyiiti eunnyi kesiindet, ama yamei koue chooto eunek tuwai, ineendet ne ratei ratuutigap peek.

⁸ Ama mwaei che siirtoi kole, “Ingotebenok perurtap Kamuktaindet ne Toroor! Kiberuurok eng' kainetap Kamuktaindet ne Toroor!”