TIENWOGIKAL 12 - BUKUIT NE TILIIL Sireet ne Dutero Kanon

Kesoom Kamuktaindet ne Toroor toreteet

Po ne oo eng' putiik; ketyen eng' inoik sisiit. Tyendap kalasunet ne po Daudi.

¹ Saru, ee Kamuktaindet ne Toroor, amu ma komi chiitap iman; kagobetyo kayanik eng' kwenutap weeriigap piik.

² Ng'alaaljingei tangoita, chii tugul ak chiitap kokwennyi; ng'alaali chemwaigutnateet ak eng' muguleldo ne pesyot aeng'.

³ Ibeeti Kamuktaindet ne Toroor kutusweek tugul che ng'alaali chemwaigutnateet, ak ng'elyepta age tugul ne lasegei.

⁴ Che ki le, “Kiterteeri eng' ng'elyebwekyok; ki tinyei kutusweek, ng'oo ne poiywech?”

⁵ Mwaei Kamuktaindet ne Toroor: “Amu sastaetap kibananook, amu tigenetap che panandos, ang'eete nguno, agoochini kotebi riibetapkei, nooto ne machei miising'.”

⁶ Tiliileen ng'aleegap Kamuktaindet ne Toroor; ko uu fedha ne kityemei eng' maat ne oo, ne kitiliili konyil tisap.

⁷ Riibech, ee Kamuktaindet ne Toroor, riibech acheek eng' ibini agoi koigeny.

⁸ Pendi kiptengeginik komoswek tugul, ye eetu yaityet eng' kwenutap piik.