TIENWOGIKAL 118 - BUKUIT NE TILIIL Sireet ne Dutero Kanon

Tyendap Katerteerisyet

¹ Omwachi Kamuktaindet ne Toroor kongoi; amu myee ineendet; amu tebyei rireenennyi koigeny.

² Ingomwa Israel kole, “Tebyei rireenennyi koigeny.”

³ Ingomwa kootap Aron nguno kole, “Tebyei rireenennyi koigeny.”

⁴ Ingomwa nguno icheek che iywei Kamuktaindet ne Toroor kole, “Tebyei rireenennyi koigeny.”

⁵ Ki aguur Kamuktaindet ne Toroor eng' pichiindanyu; ki wolwo Kamuktaindet ne Toroor ak kondea ole paraa.

⁶ Mi Kamuktaindet ne Toroor komostanyu; ma yweisyei. Imuuchi koyaiywo nee chii?

⁷ Mi Kamuktaindet ne Toroor komostanyu si ko toreto; ageere anyun eng' nyiganateet chooto che wecho.

⁸ Kaigai kimang'u Kamuktaindet ne Toroor kosiir kimang'u chii.

⁹ Kaigai kimang'u Kamuktaindet ne Toroor kosiir kimang'u pounik.

¹⁰ Ki yiema pororyosyek tugul; ang'eetoi icheek eng' kainetap Kamuktaindet ne Toroor.

¹¹ Ki yiema; ee, ki yiema; ang'eetoi icheek eng' kainetap Kamuktaindet ne Toroor.

¹² Ki yiema ko uu segemik; ki pek ko uu maatap katok; ang'eetoi icheek eng' kainetap Kamuktaindet ne Toroor.

¹³ Ki iokta inyee ile abut, ago ki toreto Kamuktaindet ne Toroor.

¹⁴ Kimnateennyu ak tyendanyu Kamuktaindet ne Toroor; ak kagoek yetunennyu.

¹⁵ Miitei emaisyegap che po iman kutitap poiboiyet ak yetunet: “Yaei eutap tai ne po Kamuktaindet ne Toroor tuguuk che kiimeen.

¹⁶ Itoroorot eutap tai ne po Kamuktaindet ne Toroor! Yaei eutap tai ne po Kamuktaindet ne Toroor tuguuk che kiimeen.”

¹⁷ Ma mee, ago asabe, ak amwaitoi poisyonigap Kamuktaindet ne Toroor.

¹⁸ Ki pira Kamuktaindet ne Toroor miising', ago ma igoito ame.

¹⁹ Oyatwa kurgotigap imanda, si awa oriit ak amwachi Kamuktaindet ne Toroor kongoi.

²⁰ Ni ko kurgeetap Kamuktaindet ne Toroor; punei che po iman.

²¹ Amwaun kongoi, amu ki iwolwoo, ak kaiegu yetunennyu.

²² Koita ne ki eesyo teegik, kaek nooto metitap luuita.

²³ Punu Kamuktaindet ne Toroor ng'olyoondoni; kwang'utyet nooto eng' konyekyok.

²⁴ Ni peetuut ne ki yai Kamuktaindet ne Toroor; kiboiboi ak kigasegei nooto.

²⁵ Ee Kamuktaindet ne Toroor, kisaain keele, sarwech nguno: ee Kamuktaindet ne Toroor, kisaain iyoogu poroteet.

²⁶ Iberuurot ineendet ne nyoonei eng' kainetap Kamuktaindet ne Toroor. Kagiberuurok acheek eng' kaberuret ne punu kootap Kamuktaindet ne Toroor.

²⁷ Kamuktaindet ne Toroor ko Kamuktaindet, ak kagogoonech lapkeiyet. Orat tiseiywot eng' poroonik, oratyi kuinoigap kaptisisyet.

²⁸ Ii Kamuktaindennyu, ak amwaun kongoi; ii Kamuktaindennyu, atoroorin.

²⁹ Omwachi kongoi Kamuktaindet ne Toroor; amu myee ineendet, amu tebyei rireenennyi koigeny.