TIENWOGIKAL 116 - BUKUIT NE TILIIL Sireet ne Dutero Kanon

Mwaetap Kongoi

¹ Achame Kamuktaindet ne Toroor amu ki kogas tweguunennyi ak soomutikyuk.

² Ki koepcha iit, amu nooto aguure ineendet anyun kota asabe.

³ Ki yiema poroonigap meet, ak ki nama ng'waninwegap ye mi che ki kobek; ki anyooru nyalilda ak arageneet.

⁴ Ki aguur anyun kainetap Kamuktaindet ne Toroor: “Ee Kamuktaindet ne Toroor, asaain ale, sarwo saboondanyu.”

⁵ Po myeeindo Kamuktaindet ne Toroor ak ko po imanda; tinyei rireenetapkei Kamuktaindennyo.

⁶ Riibei Kamuktaindet ne Toroor che nyerootiin; ki kinyerata, ago ki sarwo ineendet.

⁷ Iweekyigei kamuung'eng'ung', ee saboondanyu; amu kagoyaun Kamuktaindet ne Toroor eng' aiyebindo.

⁸ Amu ki isaru saboondanyu eng' meet, ak konyekyuk eng' peegap kong', ak keelyekyuk si ma put.

⁹ Awendotee taitap Kamuktaindet ne Toroor eng' emotinwegap che saptos.

¹⁰ Ki atinye kayanet, agot ye ki amwa ale: “Ki kinyalila miising';”

¹¹ ki amwa eng' sartaet ale: “Kiplembechonik piik tugul.”

¹² Aweekyini nee Kamuktaindet ne Toroor amu konunoikyik tugul che koono?

¹³ Aname kigombetap yetunet, ak aguure kainetap Kamuktaindet ne Toroor.

¹⁴ Agoochini Kamuktaindet ne Toroor che ki aaroorchi, ee, agoochini eng' taitap piikyik tugul.

¹⁵ Kiit ne siirtoot miising' eng' korooronindo eng' taitap Kamuktaindet ne Toroor ko meetap chechiik che tiliileen.

¹⁶ Ee Kamuktaindet ne Toroor, aa kiboityondeng'ung' iman; aa kiboityondeng'ung', aa weeriitap otwogeng'ung' ne tye; ki ityaach ratuutikyuk.

¹⁷ Agoonin korosyot ne po kongoi, ak aguur kainetap Kamuktaindet ne Toroor.

¹⁸ Agoochini Kamuktaindet ne Toroor chooto che ki aaroorchi, ee, agoochini eng' taitap piikyik tugul,

¹⁹ eng' seremusyegap kootap Kamuktaindet ne Toroor, eng' kwenung'ung', ee Jerusalem. Olasu Kamuktaindet ne Toroor!