TIENWOGIKAL 115 - BUKUIT NE TILIIL Sireet ne Dutero Kanon

Ooindap Kamuktaindet

¹ Amegoonech, ee Kamuktaindet ne Toroor, amegoonech telunateet, ago igoochi kaineng'ung', amu rireeneng'ung' ak imandang'ung'.

² Amu nee si komwa pororyosyek kole, “Mi ano Kamuktaindennywa nguno?”

³ Miitei Kamuktaindennyo kipsengwet; yaei ineendet kiy age tugul ne machei.

⁴ Po fedha ak thahabu kanamonikwak, poisyetap eunegap piik.

⁵ Tinyei kutusweek, ago ma twegu; tinyei koonyek, ago ma keertoi.

⁶ Tinyei itiik, ago ma kastoi; tinyei seruunek, ago ma ing'utoi.

⁷ Tinyei eunek, ago ma namei kiy; tinyei keelyek, ago ma pendoti; ama ng'alaale mookwekwak.

⁸ Kergeitu icheeget che kiyaei ak tuguuchooto; uu nooto age tugul ne imang'u chooto.

⁹ Ee Israel, imang'u inyee Kamuktaindet ne Toroor; ineendet toretindennywa ak long'ennywa.

¹⁰ Ee kootap Aron, omang'u okweek Kamuktaindet ne Toroor; ineendet toretindennywa ak long'ennywa.

¹¹ Okweek che oiywei Kamuktaindet ne Toroor, omang'u Kamuktaindet ne Toroor, ineendet toretindennywa ak long'ennywa.

¹² Kigobwaatech Kamuktaindet ne Toroor; iberuurech; iberuuri kootap Israel, iberuuri kootap Aron.

¹³ Iberuuri icheek che iywei Kamuktaindet ne Toroor, che mengech ak che eech.

¹⁴ Ingoyabak Kamuktaindet ne Toroor obaraitu, okweek ak lagokwok.

¹⁵ Oberuurotin eng' Kamuktaindet ne Toroor, ne ki yai kipsengwet ak ng'wony.

¹⁶ kipsengwet ko kipsengwet ne po Kamuktaindet ne Toroor. ago ki igoochi ng'wony weeriigap piik.

¹⁷ Ma ilasu Kamuktaindet ne Toroor che ki kobek, anan age tugul ne choorchingei ye mi siisek.

¹⁸ Ago kilasu acheek Kamuktaindet ne Toroor kobooch nguno agoi koigeny. Olasu Kamuktaindet ne Toroor!