TIENWOGIKAL 114 - BUKUIT NE TILIIL Sireet ne Dutero Kanon

Kwang'utikap Kamuktaindet

¹ Ye kingo manda Israel eng' Misiri, kootap Jakobo eng' piik che ng'alaale kutit ne teer;

² koek Judah oldanyi ne tiliil, ak koek Israel pounatennyi.

³ Ki keer nyanjet ineendet ak ki mwei; ki kiweekta Jordan kwo let.

⁴ Ki toroombenso tuloonook ko uu mengichik, ak ki toroombenso tuloonook che mengeechen ko uu aaregap keechiir.

⁵ Amin nee, ee nyanjani kot imwei? Amin nee, inyee Jordan kot iweeige let?

⁶ Okweek tuloonook, kalya si otorombenote ko uu mengichik? Ak okweek tuloonook che mengeechen kot otorombenote ko uu aaregap keechiir?

⁷ Potan, inyee ng'wony eng' taitap Kiptaiyat, eng' taitap Kamuktaindetap Jakobo,

⁸ ne ki wal rwandet koek tamboiyot, ak rwandet ne uui koek ole isururunee peek.