TIENWOGIKAL 112 - BUKUIT NE TILIIL Sireet ne Dutero Kanon

Kaberuuretap che po imanda

¹ Olasu Kamuktaindet ne Toroor! Paibai chii ne iywei Kamuktaindet ne Toroor, ne poiboitune miising' ng'atuutikyik.

² Tuun kimitu iyotennyi eng' ng'wony; kiberuuri ooreetap che po iman.

³ Mi koonnyi mogornateet ak perurwogik; ak tebyei imandanyi koigeny.

⁴ Ng'eetei lapkeiyet eng' mesundeito koluuchin che po iman; tinyei myeeindo, nyiitaat rireenet ak po iman.

⁵ Myee eng' chiito ne poisyei eng' myeeindo ak kobesendoi; chobei ng'aleekyik eng' imanda.

⁶ Amu ma koi kiisto; kibwaati ne po iman koigeny.

⁷ Ma iywei ineendet ng'aleek che yaacheen; igiilotkei muguleldanyi, komang'u Kamuktaindet ne Toroor.

⁸ Lumdaat muguleldanyi, ama tinyei kaiyweisyet, agoi kogeer magennyi eng' puunikyik.

⁹ Kigoseerseer, Ki kogoochi che ma tinyei kiy; tebyei imandanyi koigeny; kitoroori kuinennyi eng' teegisto.

¹⁰ Keerei kiptengekyot, ak koaragen; nyeei kelekyik ak kochoot, petei mageetap kiptengeginik.