TIENWOGIKAL 111 - BUKUIT NE TILIIL Sireet ne Dutero Kanon

Ooindap Kamuktaindet

¹ Olasu Kamuktaindet ne Toroor! Aweekyini Kamuktaindet ne Toroor kongoi eng' muguleldanyu komugul, eng' kapkirwoogetap che po iman, ak eng' tuiyet.

² Eechen poisyonigap Kamuktaindet ne Toroor, che cheeng'ei icheek tugul che poiboitune.

³ Poisyennyi ko teegisto ak etunateet; ak tebyei imandanyi koigeny.

⁴ Ki yai Kamuktaindet ne Toroor poisyonikyik che kikwong'ee si kibwaataat; po Kamuktaindet ne Toroor myeeindo ak ko nyiitaat rireenet.

⁵ Kigogoochi amitwogik che iywei ineendet; ibwaati kayomisennyi kotugul.

⁶ Ki koboorchi piikyik kimnateetap poisyonikyik, ye ki igoochi konyaban pororyosyek.

⁷ Poisyonigap eunekyik ko imanda ak kirwooget; isuldootiin kaneetisyosyekyik tugul.

⁸ Ki kigimit kotebi koigeny ak koigeny, kiyaei eng' imanda ak lititindo.

⁹ Ki koyokyi piikyik katyaget; kigong'at kayomisennyi kobunji koigeny. Tiliil ak kiywei kainennyi.

¹⁰ Kaiyweisyet ne kiywei Kamuktaindet ne Toroor ko taunetap utaatyet; tinyei kaguiyet ne myee icheek tugul che yaei chooto. Tebyei koigeny kalasunennyi.