TIENWOGIKAL 108 - BUKUIT NE TILIIL Sireet ne Dutero Kanon

Kalasunet ak Saaet agobo Katerteerisyet

¹ Igiilotkei muguleldanyu, ee Kamuktaindet, atyeni, ee atyeni kalasunoik, agot eng' toroornatennyu.

² Ong'eetyee, kibugandet ak ketubet! Ang'eete aneendet karon miising'.

³ Ee Kamuktaindet ne Toroor, aweegun kongoi eng' kwenutap piik; ak atyenun kalasunoik eng' kwenutap pororyosyek.

⁴ Amu oo rireeneng'ung' kosiir kipsengwet, ak itei imandang'ung' poolik.

⁵ Tororitu, ee Kamuktaindet, isiir kipsengwet: ak ingotororit toroornateng'ung' kosiir ng'wony komugul.

⁶ Si kesar chamaniguk, saru eng' eung'ung' ne po tai ak iwolwech.

⁷ Kigotwek Kamuktaindet eng' oldanyi ole-tiliil: “Agasigei ye apchee Shekem, ak akwaa atebweetap Sukoth.

⁸ Nenyu Gilead, ak nenyu Manasseh; Ephraim agine kimnateetap metinnyu; Judah ko kiroktonyu ne po laitornatet.

⁹ Moab ko tereet ne aunegei; awirchini kweiyondennyu Edom; aorene Philistia.”

¹⁰ Imuta ng'oo awo nganaseet ne ng'ootaat? Indoiywa ng'oo agoi Edom?

¹¹ Tos ma iwiirtech inyee, ee Kamuktaindet? Ama iwe, ee Kamuktaindet, kobooto lugosyekyok.

¹² Koonech toreteet kegirindae puunyoot: amu ma tilei kiy toretetap chii.

¹³ Kiyae tuguuk che kiimeen eng' Kamuktaindet: amu ineendet ne tyekyin ng'wony puunikyok.