TIENWOGIKAL 107 - BUKUIT NE TILIIL Sireet ne Dutero Kanon

Kitabuutap muut (T.Kal 107-150) Mwaetap Kongoi agobo Katyagnatet

¹ Oweekyi Kamuktaindet ne Toroor kongoi; amu myee ineendet: Amu tebyei rireenennyi koigeny.

² Ingomwa ko uu nooto che ki kotyach Kamuktaindet ne Toroor, che ki kotyach eng' eutap puunyoot,

³ ak ki iyum komong' eng' emotinwek, kobun kong'asiis ak cherongo, murot ne po kaataam ak murot tai.

⁴ Ki ombenoti eng' surkwen eng' turguito, ki ma nyoor nganaseet ne menyei.

⁵ Ki amoti rubeet ak melelda, kitanuiso saboonwekwak.

⁶ Ki riirchi anyun Kamuktaindet ne Toroor eng' nyalildanywa, ak ki sar icheek komang'une pichiinwekwak.

⁷ Ki indochi agine eng' ooreet ne litit, si kobiit koba nganaseet ne menyei.

⁸ Myee kolas `piik Kamuktaindet ne Toroor amu myeeindonyi, ak amu poisyonikyik che kikwong'ee, che yachin weeriigap piik!

⁹ Amu igoochin kobiyo saboondo ne tinyei emosto, ak inyiityin myeeindo saboondo ne amei rubeet.

¹⁰ Icheek che kitebee mesundeito ak urwetap meet, ko ratotiin eng' nyalilda ak kariik;

¹¹ amu ki ingelelji ng'aleegap Kamuktaindet, ak ki sas katigonutigap Ineendet Ne Toroor Miising'.

¹² Eng' nooto anyun ki iming'in Kamuktaindet ne Toroor mugulelwekwak eng' poisyet ne kibirtoegei, ki ibutyo, ak ki ma piit ne kitoret.

¹³ Ki riirchi anyun Kamuktaindet ne Toroor eng' nyalildanywa, ak ki sar icheek komang'une pichiinwekwak.

¹⁴ Ki imoong'une mesundeito ak urwetap meet, ak kong'eti tuguukwak che ki kirate.

¹⁵ Myee kolas `piik Kamuktaindet ne Toroor amu myeeindonyi, ak amu poisyonikyik che kikwong'ee, che yachin weeriigap piik!

¹⁶ Amu ki put kereiywegap sugunonik che po ormariichok, ak kitil temeleiywegap kariik.

¹⁷ Ki nyalili che perber amu pistoennywa, ak amu tengekwogikwak;

¹⁸ wechei saboonwekwak amit age tugul, ak riikyin kurgotigap meet.

¹⁹ Koriirchi anyun Kamuktaindet ne Toroor eng' nyalildanywa, ak kosar icheek komang'une pichiinwekwak.

²⁰ Iyooktoi ng'olyoondennyi, kosoop icheek, ak kosar icheek eng' ng'emisyosyekwak.

²¹ Myee kolas `piik Kamuktaindet ne Toroor amu myeeindonyi, ak amu poisyonikyik che kikwong'ee, che yachin weeriigap piik!

²² Ak ingogoito korosegap kongoi, ak komwaita poisyonikyik eng' tyendo.

²³ Icheek che choorchingei nyanjet eng' melisyek, che poisyei eng' peek che chaang'.

²⁴ Keerei chuuto poisyonigap Kamuktaindet ne Toroor, ak kwang'utikyik eng' rireet.

²⁵ Amu ng'atei ak kong'eeti kipchurchuryet, ne namjin parak mildaennyi pogei ne po peek.

²⁶ Togostoi kipsengwet, ak kochorchingei kogeny ye mi rirosyek: chootos saboonwekwak amu nyalilda.

²⁷ Iyongooti ak koterteeryoti ko uu chii ne kagobogit, ak kokwalilendos.

²⁸ Koriirchi anyun Kamuktaindet ne Toroor eng' nyalildanywa, ak komoong' icheek eng' pichiinwekwak.

²⁹ Igoochin anyun kipchurchuryet kosiis, ak kosiisyo peek che mildogei.

³⁰ Koboiboitu anyun amu kagomuung'do; ak komut agoi koit ole machei komuung'e.

³¹ Myee kolas `piik Kamuktaindet ne Toroor amu myeeindonyi, ak amu poisyonikyik che kikwong'ee, che yachin weeriigap piik!

³² Ingolas icheek ineendet eng' tuiyetap piik, ak kolas ineendet kobooto poisyek eng' kabuureitonywa.

³³ Walei ainoosyek koek surkwen, ak kong'igap peek koek emet ne yaamaat.

³⁴ Walei emet ne iyiot koek surkwen ne po muunyuk, amu sogornatetap icheeget che menyei olooto.

³⁵ Walei surkwen koek tamboiyot, ak emet ne yaamaat koek kong'igap peek.

³⁶ Ak igoochin komeny olooto che amei rubeet, si kochop nganaseet ne menyei;

³⁷ Ak kogool mbareenik, ak komiin keetiigap sabibuk, ak koges ruratennywa.

³⁸ Iberuuri anyun icheek, si kotesagis miising'; ama chamjin tuukwak kong'ering'itu.

³⁹ Ak kogeny, kichuchuchi ak kinyeroti eng' usiisyet, ak nyalilda, ak arageneet.

⁴⁰ Renyei pounik, ak kogoochi koombeniot eng' surkwen, ole ma mi ooreet.

⁴¹ Ago itoroori ne panani si ma nyoor usiisyet, ak koyai kapchii koek akweetap keechiirek.

⁴² Keerei che po iman ak kogaskei; ak konamak kuut tengekto tugul.

⁴³ Epchin iit ne utaat tuguuchuuto, ak kobwaatoti rireenosyegap Kamuktaindet ne Toroor.