TIENWOGIKAL 106 - BUKUIT NE TILIIL Sireet ne Dutero Kanon

Kong'aanyei `Israel Tengekwogik

¹ Olasu Kamuktaindet ne Toroor! Ee, oweekyi Kamuktaindet ne Toroor kongoi; amu myee ineendet; amu tebyei rireenennyi koigeny.

² Ng'oo ne imuuchi komwa poisyonigap kamuktaet, che po Kamuktaindet ne Toroor, anan ne imuuchi komwaita kalasunennyi tugul?

³ Poiboen icheek che riibei kirwooget, ak ineendet ne yaei imanda peetuusyek tugul.

⁴ Ibwaata, ee Kamuktaindet ne Toroor, eng' chameet ne ichame piiguk; ee, rutocha eng' yetuneng'ung';

⁵ si ageer poroteetap cheguuk che kigelewen, si abaibait eng' kaagaasetapkei ne po pororyeng'ung', si aloske kobooto poroteng'ung'.

⁶ Kigechalwogense kobooto kwanisyekyok, ki keyai tengekto, ki keyai ne ya kot.

⁷ Ma iguiyo kwanisyekyok kwang'utiguk eng' Misiri; ma ibwaat chaang'indap rireenosyeguk; ago ki ingelelji Ne Toroor Miising' eng' ye neegit nyanjet, nooto Nyanjet ne Piriir.

⁸ Ago ki sar icheek amu kainennyi, si kobiit konaak kimnateennyi ne po kamuktaet.

⁹ Ki kergong' Araraita ne Piriir agine, ak ki yaam; ki indochi anyun kobun rirosyek, ko uu ye punei surkwen.

¹⁰ Ak ki sar icheek eng' eutap ineendet ne kiwechei icheek, ak ki ityaach icheek eng' eutap puunyoot.

¹¹ Ak ki imaluuch peek puunikwak; ma ng'et agot agenge eng' icheek.

¹² Ki iyan anyun ng'aleekyik; ki tyen kalasunennyi.

¹³ Ne matyanit koutye poisyonikyik; ma ingen ng'olyoondennyi.

¹⁴ Ago kinyoor mageet ne oo eng' surkwen, ak ki tyem Kamuktaindet eng' turguito.

¹⁵ Ak ki igoochi kiit ne ki soom; ago ki igoochi kosogityo saboonwekwak.

¹⁶ Ki am ng'etkong' icheek agobo Musa agine eng' nganaseet, kobooto Aron ne tiliil ne po Kamuktaindet ne Toroor.

¹⁷ Ki yaatak ng'wony ak kilugui Datan, ak ki tuch kweanetap Abiram.

¹⁸ Ak ki lal maat eng' kwenunnywa; ak ki peel maat pichooto yaacheen.

¹⁹ Ki itany itoondap moita eng' Horeb, ak ki kutung'ji kanamwet ne ki kitanyi.

²⁰ Ki wal anyun telunatennywa kogergeit ak eito ne ageti.

²¹ Ki iutye Kamuktaindet, yetindennywa, ne kiga koyai tuguuk che eecheen eng' Misiri,

²² Poisyonik che kikwong'ee eng' emetap Ham, ak tuguuk che imuisei eng' ole po Araraita ne Piriir.

²³ Ki mwa anyun kole ng'emei ineendet icheek amu nooto, nda ki ma tonon Musa, nenyi ne ki kilewen eng' tainnyi kota oiyo, koweekta nereegekyik, si ma par icheek.

²⁴ Ee, ki sas icheek emet ne karaaran, ma iyan ng'olyoondennyi.

²⁵ Ki ing'unyng'ung'so eng' emaisyekwak, ama epchi iit kutitap Kamuktaindet ne Toroor.

²⁶ Ki namji parak anyun eunnyi amu nooto, kole kotoorta kobutyo eng' surkwen,

²⁷ ak koiyestaat iyotennywa koyom pororyosyek, ak koiyesta icheek eng' emotinwek.

²⁸ Ki namgei icheek ak Baal-peor, Ak ki am koroseek che ki kieng'jin che ki kobek.

²⁹ Kitach ineendet kot konereech amu poisyonikwak; ak king'eet koroito eng' kwenunnywa.

³⁰ Ki tonon anyun Phineas, korwooch: ak ki kigirinda koroito.

³¹ Ak ki kiit nooto koek imanda eng' ineendet, agoi ibinwek tugul koigeny.

³² Kitach ineendet kogeny eng' peegap Meribah, kot koyait nooto eng' Musa amu icheek;

³³ amu ki igoochi icheek koimak inee eng' muguleldanyi, ak ki ng'alaal kosartae eng' kutinnyi.

³⁴ Ma par pororyosyek, ko uu ye kiga ng'at `Kamuktaindet ne Toroor icheek.

³⁵ Ago kiburuchkei kobooto pororyosyek, ak ki ineetkei poisyonikwak.

³⁶ Ki oot icheek kanamonikwak, che ki ek mesteet eng' icheek.

³⁷ Ki igoito weeriikwak ak tiibiikwak koek tiseiywek che ki koochin oik.

³⁸ Kitumda korotiik che ma tinyei tengek, korotiigap weeriikwak ak tiibiikwak, che ki igoochi kanamonigap Kanaan koek tiseiywek; ak ki king'wanit emet eng' korotiik.

³⁹ Ki murwoniitu anyun eng' poisyonikwak, ak ki yai ibeetapkei eng' poisyonikwak.

⁴⁰ Ki nereekyi kot anyun `Kamuktaindet ne Toroor piikyik. ak ki wech porotennyi.

⁴¹ Ki igoito icheek koba eunegap pororyosyek; ak kiboi icheek che kiwechei.

⁴² Ki inyaliil icheek puunikwak, ak ki kimut icheek kogas iit eng' eunegap pichooto.

⁴³ Ki sar icheek konyil che chaang', ago ki ek ngelelik eng' ng'olyoonnywa, ak ki kiyai konyeratitu eng' tengektonywa.

⁴⁴ Ago ki keer pichiindanywa, ye kingo kas riirekwak.

⁴⁵ Ak ki ibwaat kayomisennyi ne kigayomisyi icheek, ak ki riiree icheek ko uu chaang'indap rireenosyekyik.

⁴⁶ Ki igoochi piik tugul che kiluulei icheek, koriirge.

⁴⁷ Sarwech, ee Kamuktaindet ne Toroor, Kamuktaindennyo, ak iyumech, kemang'une pororyosyek, si kobiit keeweekyi kongoi kaineng'ung' ne tiliil, ak kilasuge eng' kalasuneng'ung'.

⁴⁸ Iberuurot Kamuktaindet ne Toroor, Kamuktaindetap Israel, kobooch koigeny agoi koigeny. Ak ingomwa piik tugul kole, “Amen!” Olasu Kamuktaindet ne Toroor!