TIENWOGIKAL 104 - BUKUIT NE TILIIL Sireet ne Dutero Kanon

Kamuktaindet ko Yaindet

¹ Ilasu Kamuktaindet ne Toroor, ee saboondanyu. Ee Kamuktaindet ne Toroor, Kamuktaindennyu, ii oo miising'. Ilaachi teegisto ak etunateet.

² Inyee ne itugegei lapkeiyet ko uu ngoryeet; iitoi kipsengwet ko uu ngoryeet,

³ Ineendet ne indoi kimurtoinigap kooriikyik peek parak, ineendet ne yaei poolik koek chepkichutinnyi, ne wendote kebebaigap usoonet:

⁴ ineendet ne yaei usoonaik koek chechiik che kiyooktoi, ne yaei kiboitiinikyik koek maat ne liplibeni.

⁵ Ki ilumda lumeiywek che tonone ng'wony, si ma ki isto agoi koigeny.

⁶ Ki ilaakyi ng'wony rireet ko uu ngoryeet; ki imaluuchi peek tuloonook.

⁷ Ki mweiso icheek eng' kereng'ung' po kong', ki chaakta eng' cheetap tuleeng'ung'.

⁸ Ki togosta tuloonook, ak ki choorchigei atebwosyek, agoi koit ole ki ichopchi.

⁹ Ki inde kiwoteet si ma siir, si ma week kogeny kotuch ng'wony.

¹⁰ Iyooktoi kong'igap peek korootyi atebwosyek; chokyogoni eng' tuloonook:

¹¹ Inagi peek tyondo age tugul ne po timiin; imise sigirogap timiin meleldanywa.

¹² Menyei toriitik che po parak ngeguusyekwak, tyendos eng' mooriikap keetiik.

¹³ Ibise peek tuloonook eng' kooriikyik; piyonyi ng'wony logoegap poisyoniguk.

¹⁴ Ibiityin tuuga susweek, ak ingweek si koboisyee chiito, si komoong' amitwogik eng' ng'wony:

¹⁵ ak divaik che iboiboi muguleldap chiito, ak mwaita ne itilyali togeennyi, ak amitwogik che igimiti muguleldap chii.

¹⁶ Piyonyi peek keetiigap Kamuktaindet ne Toroor; taragonigap Lebanon, che ki komiin.

¹⁷ Ole teechei kesonokwak `toriitik; kootap cheptalamyat piribiryet.

¹⁸ Po tuloonook che kooen ng'oroorek che po timiin; rwandosyek ko ole mwechin kenerok.

¹⁹ Ki inde arawet si koboor peetuusyek; ingen asiista ole roroktae.

²⁰ Iyae mesundeito, ak koek kemoi, eng' nooto anyun, koguiguiyon tyony age tugul ne po timiin komong'.

²¹ Pooriseni neranigap ng'etuunyik ye mi logeennywa, ak cheeng'ei amitwogikwak eng' Kamuktaindet.

²² Ye chor asiista komwei, ak koruiyo eng' kebenonikwak.

²³ Wendi chiito poisyennyi kwo kobois agoi koimen.

²⁴ Ee Kamuktaindet ne Toroor, chaang' ne tya poisyoniguk! Ki iyai tugul eng' utaatyet; nyiitaat ng'wony mogornatosyeguk.

²⁵ Mi oliin nyanjet, ne oo ak ko tebees, ole mi tuguuk che ichuutegei che ma iitoksei, tyong'ik che mengeechen ak che eecheen.

²⁶ Pendi olooto melisyek, mi olooto tyondo ne oo ne po peek, ne uu ting'ong'et, ne ki iyai kourerene olooto.

²⁷ Igenin chuuto tugul, si igoochi amitwogikwak eng' peetuusyekwak.

²⁸ Iyumi icheek chooto che igoochini; ing'aanye eung'ung' ak piyang'dos icheek tuguuk che myach.

²⁹ Ye keuny togeng'ung', kotoptobenso; ye inemu kabusennywa, kobegu icheek, ak koweektagei temburyekwak.

³⁰ Iyooktoi Kabuuseng'ung' ne Tiliil, si keyai kobiit, kosapcho; ak ichobe itoondap emet koleelit kogeny.

³¹ Ingotep toroorindap Kamuktaindet ne Toroor koigeny; Ingobaibait Kamuktaindet ne Toroor eng' poisyonikyik.

³² Potani ng'wony ye kageer ineendet; twaei tuloonook ak koiyenso.

³³ Atyenjini Kamuktaindet ne Toroor kotee asabe; atyenjini Kamuktaindennyu kalasunet kota asabe.

³⁴ Ingochamagis kabwaatutikyuk eng' ineendet; agasigei eng' Kamuktaindet ne Toroor.

³⁵ Ingiwong' kiptengeginik eng' ng'wony, ak ingobetyo che yaacheen agoi. Ilasu Kamuktaindet ne Toroor, ee saboondanyu. Olasu Kamuktaindet ne Toroor!