TIENWOGIKAL 103 - BUKUIT NE TILIIL Sireet ne Dutero Kanon

Mwaetap Kongoi agobo Myeeindap Kamuktaindet

¹ Ilasu Kamuktaindet ne Toroor, ee saboondanyu, ak ingolas kainennyi ne tiliil tugul che mi oriitinnyu.

² Ilasu Kamuktaindet ne Toroor, ee saboondanyu, ameutyee konunoikyik tugul.

³ Ineendet ne nyoun kaat tengekwogiguk tugul; ak kosaabin eng' myanwogiguk tugul,

⁴ ineendet ne ityaachi saboondang'ung' eng' ye mi ng'emisyet; ak kolaagun kuutweetap chamyet ne tala ak rireenosyek,

⁵ ne koonin tuguuk che myach kot koyamin si kiweegun ming'inateng'ung' ko uu kipsiichit.

⁶ Yaei Kamuktaindet ne Toroor poisyonigap imanda, ak kirwoogutik agobo tugul che kisastae.

⁷ Ki iboorchi Musa ortinwekyik, ki iboorchi lagogap Israel poisyonikyik.

⁸ Nyiitaat Kamuktaindet ne Toroor rireenet ak ko po myeeindo, ma sip konereechi ak tinyei rireenet ne oo.

⁹ Ma kerei kong' kotugul, ama konori nereegekyik agoi.

¹⁰ Tom koyaiywech ko uu ye nyoljin chalwogikyok, ama igeerwech ko uu tengekwogikyok.

¹¹ Amu ko uu ye toroor kipsengwet eng' ng'wony, ko uu nooto rireenennyi eng' icheek che iywei ineendet.

¹² Ko uu ye loochin kong'asiis ak cherongo, ko uu nooto kigoistoenech chalwogikyok kolooegitu.

¹³ Ko uu ye riiree kwanda lagokyik, ko uu nooto riiree `Kamuktaindet ne Toroor icheek che iywei ineendet.

¹⁴ Amu ingen poorwekyok; ibwaati ineendet kole kitemburyek.

¹⁵ Ago chiito, ko uu peetuusyekyik susweek; tuneni ko uu taapteet ne po kewanin;

¹⁶ amu punei yooto usoonet, ak kobetito taptanooto; ama kongen oldanyi kogeny.

¹⁷ Ago tebyei rireenetap Kamuktaindet ne Toroor koigeny ak koigeny eng' icheek che iywei ineendet, ak imandanyi eng' lagogap lagok,

¹⁸ eng' icheek che riibei kayomisennyi, ak kobwaati koyai ng'atuutikyik.

¹⁹ Kigogimiit Kamuktaindet ne Toroor ng'echerennyi ne po laitornatet eng' kipsengwet; ak pou laitornatennyi tugul.

²⁰ Olasu Kamuktaindet ne Toroor, okweek malaikaisyekyik; okweek che oo kiimeen eng' kamuktaet, che osuldoi ng'olyoondennyi, che oepchini iit tuugeetap ng'olyoondennyi.

²¹ Olasu Kamuktaindet ne Toroor, okweek lugosyekyik tugul, okweek che oo kiboitiinikyik, che oyae magennyi.

²² Olasu Kamuktaindet ne Toroor, okweek poisyonikyik tugul, eng' komoswek tugul ole pou ineendet. Ilasu Kamuktaindet ne Toroor, ee saboondanyu.