TIENWOGIKAL 102 - BUKUIT NE TILIIL Sireet ne Dutero Kanon

Saaetap Toreteet kobun Laitoryat ne po Koigeny

¹ Kas saaennyu, ee Kamuktaindet ne Toroor, ak ingobwonjin riirekyuk.

² Ameung'ena togeng'ung' eng' peetuutap nyalildanyu! Epcha iit; wolwo chokyi eng' peetuut ne aguursei.

³ Petos peetuusyekyuk ko uu iyeto, ak kibeelei kawekyuk ko uu kegenget.

⁴ Kagebir muguleldanyu ko uu susweek ak kagores; ak autye agot aam amitwogikyuk.

⁵ Amu tuugeetap tigenennyu ko kanamgei kawekyuk ak panyeek.

⁶ Aa uu chebo kibabaa ne po surkwen; kaige anee sugurut ne po surkwen.

⁷ Ariipsei, ak kaaegu ne kergei ak toriityon ne mi ineegei koot parak.

⁸ Rosyina puunikyuk peetuut komugul; icheeget che wecho miising' ko poisyee kainennyu ko chubisyee.

⁹ Aame oreek koek amitwogik, ak ki aburuch tuguukyuk che aee kobooto peegap kong',

¹⁰ amu koroomindap nereegeguk ak nyitateng'ung'; amu ki iganaba ak iwiirta.

¹¹ Uu peetuusyekyuk urwet ne iyaptagei; ak ki ares ko uu susweek.

¹² Ago inyee, ee Kamuktaindet ne Toroor, ilaitorani koigeny; tebyei kabwaatetap kaineng'ung' agoi ibinwek tugul.

¹³ Ing'eete ak iriiree Zion, amu kagoyam keriree, ee, kagoit peetuut ne ki kichopchi.

¹⁴ Amu poiboitu kiboitiniguk eng' koikyik, ak ko riiree temburyekyik.

¹⁵ Iywei anyun pororyosyek kainetap Kamuktaindet ne Toroor, ak koywei laitorinik tugul che po ng'wony toroornateng'ung'.

¹⁶ Teechei `Kamuktaindet ne Toroor Zion, taagu inee eng' toroornatennyi.

¹⁷ Kagogas saaetap kibananiat, ama sas saaennywa.

¹⁸ Ngesir niito agobo ibinda ne tuun piitu; si kolas Kamuktaindet ne Toroor `piik che tuun ki sichei.

¹⁹ Ki kogeer ineendet olito po ng'wony eng' toroorindap oldanyi ne tiliil; ki keer Kamuktaindet ne Toroor ng'wony eng' kipsengwet,

²⁰ si kogas tigenetap kimonjororyot; si kotyach icheek che kigechopchi meet;

²¹ si kobarta piik kainetap Kamuktaindet ne Toroor eng' Zion, ak kalasunennyi eng' Jerusalem;

²² Ye kagoyumgei piik, ak laitornatosyek, si koboisyechi Kamuktaindet ne Toroor.

²³ Ki yai kimnateennyu konyalul eng' ooreet; kitil peetuusyekyuk konwagitu.

²⁴ Ki ale, “Ee Kamuktaindennyu, amemuta eng' kwenutap peetuusyekyuk. Tebyei kenyisyeguk agoi ibinwek tugul.”

²⁵ Ki iyai ole tonone ng'wony keny, ak poisyetap euneguk kipsengwet.

²⁶ Petos icheek, ago itebye inyee agoi; osegitu icheek tugul ko uu ngoryeet. Ak iwale icheek ko uu ngoryeet, ak kowalogis.

²⁷ Ago ii uu nooto inyee agoi, ama tinyei kenyisyeguk ole igeesunegei.

²⁸ Tebyei ko riibotin lagogap kiboitiniguk, ak kimitu iyotennywa eng' taing'ung'.