TIENWOGIKAL 10 - BUKUIT NE TILIIL Sireet ne Dutero Kanon

Kesoom kirwookyi piik che yaacheen

¹ Ee Kamuktaindet ne Toroor, amu nee si itonone ole loo? Kalya si iunykei eng' peetuusyegap nyalilda?

² Inyalili `kiptengeginik che menoot kibananook eng' koroomnateet; ingonam icheek mestonok che ki kobwaat.

³ Ilasunegei kiptengekyot mageetap muguleldanyi, icheeget che kipkeinik agobo kelunet ko chubei ak kosasei Kamuktaindet ne Toroor.

⁴ Leen kiptengekyot eng' menatennyi, “Ma mage kiy Kamuktaindet;” leen eng' kabwaatutikyik tugul, “Ma mi Kamuktaindet.”

⁵ Ortinwekyik ko poorei kotugul; mi parak kirwoogutiguk, ma ityin kogeer; ak sasei `ineendet puunikyik tugul.

⁶ Leen eng' muguleldanyi, “Ma istaa chii; ma anyooru anee yaityet eng' ibinwek tugul.”

⁷ Nyiitaat kutinnyi chubisyet ak ng'aalseet ak sastaet; miitei ng'elyeptanyi mastaet ak yaityet.

⁸ Tebee ole ung'egei eng' nganasook; parei che ma tinyei ng'oogi eng' komoswek che ung'ootiin. Sapchin konyekyik ineendet ne nyeraat;

⁹ saptoi eng' ole ung'aat ko uu ng'etundo eng' kebenennyi; sapchin kole si konam kibananook; namei kibananiat eng' mestennyi ak kochuut.

¹⁰ Ribisi, ing'uruuksei, ak kobutyo che nyalildos amu chechiik che kiimeen.

¹¹ Leen eng' muguleldanyi, “Ko koutye Kamuktaindet; unyei togeennyi, ma keerei agoi.”

¹² Ng'eet, ee Kamuktaindet ne Toroor! Ee Kamuktaindet, namji parak eung'ung'; ameutyee che kiusei.

¹³ Amu nee si kosas `kiptengekyot Kamuktaindet? Ak koleen eng' muguleldanyi, “Memage kiy”?

¹⁴ Ago igeertoi inyee; igeere inyee mastaet ak tagisyet, si ibou eng' eung'ung'. Tienengei ne nyeraat; ki iegu toretindetap ne ma tinyei sigiik.

¹⁵ Irii eutap kiptengekyot; cheeng' tengektap ne ya kot koma komi.

¹⁶ Kamuktaindet ne Toroor ko Laitoryat koigeny ak koigeny; ki ko petyo pororyosyek eng' emennyi.

¹⁷ Ki igas inyee, Kamuktaindet ne Toroor, mageetap che talaen; ichobe mugulelwekwak ak igoochini itiiguk kogas.

¹⁸ Ibesyechini ne ma tinyei sigiik ak ne kisastae, si mata komuiso kogeny chii ne po ng'wony.