TAUNET 9 - BUKUIT NE TILIIL Sireet ne Dutero Kanon

Arorutyet ak Noah

¹ Ki iberuur `Kamuktaindet Noah ak weeriikyik ak koleenji, “Osigisye ak otesage, ak onyi ng'wony!

² Iyweok ak koarageni tyony age tugul ne po ng'wony agobo okweek; agot toriit alak tugul che po parak, tugul che pendoti kochuutegei eng' ng'wony ak njireenik tugul che po nyanjet; tugul ko kaginde eunekwok.

³ Egu amitwogikwok kiy age tugul ne sabei ne wendoti; kagoonok tugul ko uu ye kiga agoonok tuguuk che piitos alak tugul che nyalileen.

⁴ Ago moam panyeek kobooto saboondonyi ne nooto ko korotiik.

⁵ Amagenok ne matiny korotiigap saboonwekwok agobo saboondap chii, eng' tyony age tugul ak eng' chii anan ko eng' ne tupcho.

⁶ Chii age tugul ne tumdoi korotiigap chii, ketumdoi chechiik agine; amu eng' itoondonyi ko ki yai `Kamuktaindet chii.

⁷ Osigisye ak otesage osigisye kot ochaang'e miising' eng' ng'wony.”

⁸ Ak ki leenji `Kamuktaindet Noah ak weeriikyik,

⁹ “Ogaso! Kaagimiit kayomisenyu kobootok ak kobooto iyoteng'wong' ne piitu let,

¹⁰ ak kobooto kiy age tugul ne sabei ne mi kobootok; eng' toriitik, eng' kiyagiik ak eng' tyong'ik alak tugul che po ng'wony, ko uu ole kimang'undo eng' moinget.

¹¹ Ak agimiit kayomisennyu kobootok ale, ma kebarei kiwong'u kogeny tugul che saptos eng' peek che po maraneet, ak ma kobiitu maraneet ne ng'emei ng'wony.”

¹² Ki mwa Kamuktaindet kole, “Kaboorunet ni ne po kayomiset ne kagiyomiskei eng' kwenunnyo, anee ak okweek ak kiy age tugul ne sabei ne mi kobootok agobo ibinwek tugul che pwoonei:

¹³ Kande chemng'isiryennyu poolik parak, si koek kaboorunet ne po kayomiset ne mi kwenunnyoo, anee ak ng'wony.

¹⁴ Ye kabiit poolik eng' parak, ak kotook anyun chemng'isiryet eng' parak,

¹⁵ abwaat anyun kayomisennyu ne mi kwenunnyoo, anee ak okweek ak kiy age tugul ne sabei. Ma kobiitu kogeny peek che marandos che iwong'u tugul che saptos.

¹⁶ Ye took anyun chemng'isiryet eng' poolik, ageer ak abwaat kayomiset ne tebyei agoi koigeny, ne mi kwenutap Kamuktaindet ak kiy age tugul ne sabei ne mi ng'wony.”

¹⁷ Ki leenji `Kamuktaindet Noah, “Kaboorunet ni, ne po kayomiset ne kaayai eng' kwenunnyoo anee ak tugul che saptos che mi ng'wony.”

Noah ak Weeriikyik

¹⁸ Weeriigap Noah che ki mong' eng' moinget ko ki Shem, Ham ak Japhet. Ham ko ki kwandap Kanaan.

¹⁹ Chuuto somok ko ki weeriigap Noah, ak ki yom ng'wony komugul iyotennywa.

²⁰ Ki toi Noah koek kabatindet, ak kimin mbareetap sabibuk.

²¹ Ak kie maiyek ak kobogit, ak ki tep aach ngor eng' emainnyi.

²² Ki keer Ham, kwandap Kanaan, kwandanyi kotebyei aach ngor, ak ki mwachi tupchosyekyik aeng' che ki mi saang'.

²³ Ki ng'eetyo Shem ak Japhet konem sambut, ak komure tigigoikwak icheek tuwai ak kobee patai ak kotuch kwandanywa ne ki mi aach ngor. Kibee patai si ma keer kwandanywa komi aach ngor.

²⁴ Ye kingo ng'eet anyun Noah eng' pogitennyi, ak konai tuguuk che kagoyachi weeriinnyi ne ming'in,

²⁵ ak ki le, “Ingochubok Kanaan! Egu otwogindetap otwogik eng' tupchosyekyik.”

²⁶ Ak ki le, “Ingoberuurok Shem eng' Kamuktaindet ne Toroor, ak ingoek Kanaan otwogindennyi.

²⁷ Ingobara `Kamuktaindet Japhet, ak ingomeny koriigap Shem; ak ingoek Kanaan otwogindennyi.”

²⁸ Ki tar Noah kenyiisyek alak pogol somok ak konom ye kingo pata maraneet.

²⁹ Kenyiisyek tugul che ki tar Noah ko pogol sogool ak konom; yeityo koolil.